جەتىسۋ وبلىسى كەربۇلاق اۋدانىنىڭ اكىمى قانات ەسبولاتوۆ رەسپۋبليكا كۇنى قارساڭىندا بالاباقشا تاربيەشىسى گالينا دەميناعا جوق ءۇيدىڭ كىلتىن تابىس ەتكەن، دەپ حابارلايدى Dalanews.kz.

ءىس-شارا بارىسىندا اۋدان اكىمى زەينەتكەرگە  قۇنى 8،7 ميلليون تەڭگە تۇراتىن ءۇيدىڭ كىلتىن سالتاناتتى تۇردە تابىستاعان. الايدا بىرنەشە جىلدان بەرى ءۇيلى بولۋدى ارمانداعان گالينا دەمينانىڭ قۋانىشى كوپكە سوزىلماعان.

سەبەبى سالتاناتتى تابىستاۋ ءراسىمى وتكەننەن كەيىن اكىمدىك وعان ءۇيدىڭ جوق ەكەنىن جەتكىزگەن.

اكىمدىك دەميناعا ءوز بەتىنشە تۇرعىن ءۇي تابۋدى ۇسىنعان. زەينەتكەردىڭ سوزىنشە، ولار باسىندا بەرگەن ۋادەسىنەن تايعان.

“مەرەكەلىك شارادا ماعان ءۇيدىڭ كىلتىن تابىستادى. قۋانىشتان كوز جاسىما ەرىك بەردىم. ءبىراق دەمالىستان كەيىن قۋانىشىم سۋ سەپكەندەي باسىلدى. ولار ماعان ءۇيدىڭ جوق ەكەنىن ايتتى”، - دەيدى ول.

ونىڭ سوزىنشە، اكىمدىك باسپانانى 8،7 ميلليونعا ەمەس، 3،8 ميلليون تەڭگەگە تاۋىپ كەلۋىن ەسكەرتكەن. 

“ءۇيدى ءوزىم ىزدەدىم. بۇكىل اۋىلدى ارالاپ، بۇل سوماعا ەشتەڭە تابا المادىم”، - دەيدى گالينا.

اكىمدىك زەينەتكەرگە ەكى اپتا بۇرىن باسپانا ماسەلەسىن شەشىپ بەرۋگە ءسوز بەرگەن كورىنەدى. وكىنىشكە قاراي، سودان بەرى ءۇنسىز قالعان.