Jetisý oblysynda Halyqaralyq balalar kúnine orai aýyldyq jerlerde turatyn 84 otbasy baspanaly boldy. Atap aiqtqanda, Kerbulaq aýdanynyń Saryózek aýylynda jáne Aqsý aýdanynyń Jansúgirov aýylynda kezekte turǵandarǵa jańa páterdiń kilti tapsyryldy, – dep habarlaidy Dalanews.kz
Kerbulaq aýdany Saryózek aýylynda jeke qurylys salýshylar esebinen kóp qabatty úi salynyp, bul úi apatty úilerdiń máselesin sheshý úshin biýjet qarjysyna satyp alyndy. Kóp qabatty úide 30 úsh bólmeli, 15-ten bir jáne eki bólmeli páter bar. Sóitip apatty úilerdiń turǵyndary retinde kezekte turǵan 60 otbasy jańa páterge ie boldy.
- Apatty úide otbasymyzben turyp jatqanymyzǵa 22 jyl boldy. Eki bólmeli páterde jeti adam turdyq. Kezegimiz kelip, úsh bólmeli jańa páterge qol jetkizip, búgin Balalardy qorǵaý kúninde qonystoiyn toilap jatyrmyz. Bul – balalarym men nemerelerim úshin, búkil otbasymyz úshin – úlken qýanysh, - deidi Saryózek aýylynyń turǵyny Klara Shkanova.
Atap ótsek, oblys qurylǵannan beri Kerbulaq aýdanynda 320 otbasyǵa úi berildi. Bul rette biyl aýdanda joǵaryda atalǵan 60 jańa qonys iesin qosa alǵanda, 400-ge jýyq otbasyn turǵyn úimen qamtý josparlanǵan.
Merekelik qýanyshty Aqsý aýdany Jansúgirov aýylynyń turǵyndary da atap ótti. Munda 24 páterli kóp qabatty úidiń kilti kezekte turǵan áleýmettik osal sanattaǵylarǵa, kóp balaly otbasylar men jetim balalarǵa tabystaldy. Olardyń ishinde tórt balanyń anasy Anargúl Bijanova da bar:
- Turǵyn úige kezekte 5 jyl turdyq. Tórt balamyz bar. Búgin otbasymyzben óz baspanamyzǵa ie boldyq. Páter kiltin Balalardy qorǵaý kúninde qolymyzǵa alyp otyrmyz. Bul memlekettiń óskeleń urpaqqa degen qamqorlyǵynyń aiqyn úlgisi dep bilemiz, - dep oi bólisti A. Bijanova.
Osy oraida 3 jyl ishinde Aqsý aýdanynyń Jansúgirov, Qapal jáne Matai aýyldarynda 117 otbasy jańa qonysqa kirdi.
Atap ótsek, oblys qurylǵannan beri óńirde barlyq qarjylandyrý kózderi esebinen shamamen 1 mln.sharshy metr turǵyn úi paidalanýǵa berildi. Qabyldanyp jatqan sharalardyń arqasynda kezekte turǵan 5735 azamat jańa qonysqa ie boldy, bul rette biyl taǵy 2026 adamdy turǵyn úimen qamtamasyz etý josparlanýda.
