Jetisý oblysynyń kolejderinde bıylǵy oqý jylynda on jeti jańa mamandyq ashylýda, bul óńirdegi suranysy bar kadrlardyń tapshylyǵyn sheshýge yqpal etpek, – dep habarlaıdy Dalanews.kz Jetisý oblysy ákiminiń baspasóz qyzmetine silteme jasap.
Jetisý oblystyq Bilim basqarmasynyń málimetinshe, 2023-2024 oqý jylynda óńirde 13 kolejde 17 jańa mamandyq ashý josparlanýda, onyń 14-ine lısenzıa alyndy.
– Bıyl Taldyqorǵan qalasynyń birqatar kolejderinde, sondaı-aq Kóksý, Alakól, Aqsý, Sarqan, Panfılov aýdandary men Tekeli qalasynyń oqý oryndarynda jańa mamandyqtar ashylyp jatyr.
Atap aıtqanda, «Qant óndirisi», «Ǵımarattardy jobalaý men paıdalanýdyń avtomattandyrylǵan júıeleri», «Grafıkalyq dızaın», «Sýmen jabdyqtaý jáne sý burý júıelerin tazartý qondyrǵylaryn paıdalaný», «Landshafty dızaın», «Tótenshe jaǵdaılardy qorǵaý», «Zerthanalyq dıagnostıka», «Baý-baqsha sharýashylyǵy», «Qurylys jáne avtomobıl joldary men áýe aılaqtaryn paıdalaný», «Orman sharýashylyǵy», «Týrızm», «Veterınarıa», «Kıim dızaıny», «Logopedıa» jáne basqalary bar, – dep atap ótti basqarma mamandary.
Aldaǵy 5 jylda óńirde sút, balyq óndirisi, taý-ken metalýrgıasy, týrızm salalarynda birqatar óndiristik obektiler men kásiporyndardyń qurylysy josparlanǵandyqtan, 2024-2025 oqý jylynda óńirdiń 11 kolejinde taǵy 14 jańa mamandyq ashý kózdelgen.
Sonyń arqasynda óńirde tehnık-geologtardy, tehnık-marksheıderlerdi, ushqyshsyz ushý apparattarynyń operatorlaryn, mal sharýashylyǵy sheberlerin, mal sharýashylyǵy keshenderi men mehanıkalandyrylǵan fermalardyń operatorlaryn, kran mashınısterin oqytý men daıarlaýǵa múmkindik týady.
Óńir ekonomıkasyn damytý úshin «Gazben jabdyqtaý quraldary men júıelerin montajdaý jáne paıdalaný», «Slesar isi» (túrli salalar men túrler boıynsha), «Avtomobıl kóligine tehnıkalyq qyzmet kórsetý, jóndeý jáne paıdalaný», «Týrızm» jáne «Sáýlet», sondaı-aq «Balyq aýlaý sharýashylyǵy», «Jylyjaı sharýashylyǵyn uıymdastyrý» jáne t. b. mamandyqtarǵa erekshe nazar aýdarylatyn bolady.
Aıta keteıik, búginde Jetisý oblysynda 27 kolej bar, onyń 21-i memlekettik jáne 6-ýy jekemenshik, olarda 70 mamandyq jáne 113 biliktilik boıynsha 13 964 stýdent oqıdy.
