جەتىسۋ وبلىسىنىڭ كوللەدجدەرىندە بيىلعى وقۋ جىلىندا ون جەتى جاڭا ماماندىق اشىلۋدا، بۇل وڭىردەگى سۇرانىسى بار كادرلاردىڭ تاپشىلىعىن شەشۋگە ىقپال ەتپەك، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جەتىسۋ وبلىستىق ءبىلىم باسقارماسىنىڭ مالىمەتىنشە، 2023-2024 وقۋ جىلىندا وڭىردە 13 كوللەدجدە 17 جاڭا ماماندىق اشۋ جوسپارلانۋدا، ونىڭ 14-ىنە ليسەنزيا الىندى.
– بيىل تالدىقورعان قالاسىنىڭ ءبىرقاتار كوللەدجدەرىندە، سونداي-اق كوكسۋ، الاكول، اقسۋ، سارقان، پانفيلوۆ اۋداندارى مەن تەكەلى قالاسىنىڭ وقۋ ورىندارىندا جاڭا ماماندىقتار اشىلىپ جاتىر.
اتاپ ايتقاندا، «قانت ءوندىرىسى»، «عيماراتتاردى جوبالاۋ مەن پايدالانۋدىڭ اۆتوماتتاندىرىلعان جۇيەلەرى»، «گرافيكالىق ديزاين»، «سۋمەن جابدىقتاۋ جانە سۋ بۇرۋ جۇيەلەرىن تازارتۋ قوندىرعىلارىن پايدالانۋ»، «لاندشافتى ديزاين»، «توتەنشە جاعدايلاردى قورعاۋ»، «زەرتحانالىق دياگنوستيكا»، «باۋ-باقشا شارۋاشىلىعى»، «قۇرىلىس جانە اۆتوموبيل جولدارى مەن اۋە ايلاقتارىن پايدالانۋ»، «ورمان شارۋاشىلىعى»، «تۋريزم»، «ۆەتەريناريا»، «كيىم ديزاينى»، «لوگوپەديا» جانە باسقالارى بار، – دەپ اتاپ ءوتتى باسقارما ماماندارى.
الداعى 5 جىلدا وڭىردە ءسۇت، بالىق ءوندىرىسى، تاۋ-كەن مەتاللۋرگياسى، تۋريزم سالالارىندا ءبىرقاتار وندىرىستىك وبەكتىلەر مەن كاسىپورىنداردىڭ قۇرىلىسى جوسپارلانعاندىقتان، 2024-2025 وقۋ جىلىندا ءوڭىردىڭ 11 كوللەدجىندە تاعى 14 جاڭا ماماندىق اشۋ كوزدەلگەن.
سونىڭ ارقاسىندا وڭىردە تەحنيك-گەولوگتاردى، تەحنيك-ماركشەيدەرلەردى، ۇشقىشسىز ۇشۋ اپپاراتتارىنىڭ وپەراتورلارىن، مال شارۋاشىلىعى شەبەرلەرىن، مال شارۋاشىلىعى كەشەندەرى مەن مەحانيكالاندىرىلعان فەرمالاردىڭ وپەراتورلارىن، كران ماشينيستەرىن وقىتۋ مەن دايارلاۋعا مۇمكىندىك تۋادى.
ءوڭىر ەكونوميكاسىن دامىتۋ ءۇشىن «گازبەن جابدىقتاۋ قۇرالدارى مەن جۇيەلەرىن مونتاجداۋ جانە پايدالانۋ»، «سلەسار ءىسى» (ءتۇرلى سالالار مەن تۇرلەر بويىنشا)، «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ»، «تۋريزم» جانە «ساۋلەت»، سونداي-اق «بالىق اۋلاۋ شارۋاشىلىعى»، «جىلىجاي شارۋاشىلىعىن ۇيىمداستىرۋ» جانە ت. ب. ماماندىقتارعا ەرەكشە نازار اۋدارىلاتىن بولادى.
ايتا كەتەيىك، بۇگىندە جەتىسۋ وبلىسىندا 27 كوللەدج بار، ونىڭ 21ء-ى مەملەكەتتىك جانە 6-ۋى جەكەمەنشىك، ولاردا 70 ماماندىق جانە 113 بىلىكتىلىك بويىنشا 13 964 ستۋدەنت وقيدى.
