Qazaqstanda bastaýysh synyp oqýshylaryna bólim boiynsha jiyntyq baǵalaý (BJB) men toqsandyq jiyntyq baǵalaýdy (TJB) alyp tastaý máselesi qaralyp jatyr. Bul týraly oqý-aǵartý ministri Juldyz Súleimenova Parlament palatalarynyń birlesken otyrysynan keiin aitty, dep habarlaidy dalanews.kz.
Ministrdiń sózinshe, bul - ata-analar jii kóteretin máselelerdiń biri. Óitkeni jiyntyq baǵalaý tapsyrmalaryn oryndaýǵa ata-analardyń aralasýy jiilep ketken.
Juldyz Súleimenova BJB men TJB bastapqyda oqýshylardyń bilim deńgeiin baǵalaý úshin engizilgenin, alaida qazirgi júie kútken nátijeni tolyq bere almai otyrǵanyn aitty. Sonymen qatar, sheneýnik jiyntyq baǵalaý nátijeleri satylýyna qatysty derek tekserilip jatqanyn jetkizdi. Onyń pikirinshe, mundai áreketterge quqyqtyq baǵa berilýi qajet.
Ministr damyǵan elderdiń kópshiliginde kriterialdy baǵalaý júiesi qoldanylǵanymen, bastaýysh synyptarda BJB men TJB ótkizilmeitinin atap ótti. Osyǵan bailanysty ministrlik bul baǵalaý túrlerin bastaýysh synyptardan alyp tastaý máselesin talqylap jatyr.
Sondai-aq, ol Májilis depýtaty Irina Smirnovanyń BJB men TJB júiesin engizýge jaýapty tulǵalardy jaýapkershilikke tartý týraly usynysyna pikir bildirdi. Ministrdiń aitýynsha, bul máseleni jáne júiege bólingen qarjynyń jumsalýyn Joǵary aýditorlyq palata men ózge de ýákiletti organdar qaraidy.
Oqý-aǵartý ministrliginiń baǵalaýynsha, 2016 jyldan beri qoldanystaǵy bilim berý standarttary men kriterialdy baǵalaý júiesi kútken nátijege qol jetkize almaǵan. Sondyqtan ata-analar men muǵalimder tarapynan júiege qatysty syn-eskertpeler jii aitylyp keledi.
BJB men TJB taǵdyryna qatysty sońǵy sheshim biyl tamyzda jariialanady.
