Ekspedısıa «Jetisý adaldyq alańy» jobalyq keńsesiniń bastamasymen jáne Almaty oblystyq ákimdiginiń qoldaýymen júzege asqan. Túpki maqsat – otandyq týrızmdi nasıhattaý ári sybaılas jemqorlyqqa qarsy mádenıet qalyptastyrý.
Rejıser Erlan Ushaqbaev, ekstremaldy sportshy Sáken Kaǵarov jáne bloger Aselına Saılaýmbekova bastaǵan top Almaty oblysynyń Talǵar aýdanynda ornalasqan Qarlytaý shyńyna shyqty. Olar 9 kún ishinde 5450 metr bıiktikti eńsergen.
– Bıyl «Jastar jyly» dep jarıalanǵany bizderdi qatty qýantty. Osy oraıda el aýmaǵynda ártúrli baǵdarlamalar qolǵa alynyp, jańa jobalar júzege asyrylýda. Baǵdarlama aıasynda biz de atsalysýdy jón sanadyq. Árıne, bıiktikti baǵyndyrý ońaıǵa soqqan joq. Bıiktikke kóterilgen saıyn aýa raıy ózgerip, qolaısyzdyqtar da týyndady. Alaıda maqsatqa jetýge shydamdylyq pen shymyrlyq jáne ózara bereke-birlikterimiz muryndyq boldy. Qıyn da bolsa qyzyqty ótken sapardan qanattana oraldyq, – dedi sportshy Sáken Kaǵarov.
Jalpy, áýesqoı álpınıser top quramynda qazaqstandyq beıne blogerler, vaınerler, lifestyle ókilderi men sportshylar bar.
– Almaty oblysynda «Jetisý – adaldyq alańy» atty mekeme qurylǵan. Sol mekeme aıasynda shyńdardy baǵyndyr jáne jemqorlyqtan aýlaq bol degen jobamen birneshe is-sharalardy uıymdastyrýdamyz. Sonymen qatar erekshe atap ketetin dúnıe Almaty oblysynyń jas memlekettik qyzmetshileri «Shyńdardy baǵyndyr» uranymen Almaty kólindegi «Úlken Almaty shyńyn» jáne keler jyly keń kólemde atalyp ótiletin Abaı Qunanbaıulynyń 175 jyldyǵyna oraı «Abaı shyńyn» baǵyndyrýdy josparlap otyrmyz, – dedi Almaty oblysynyń ishki saıasat basqarmasynyń basshysy Rýstam Álıuly.
Baljan JUMANBEKOVA, Almaty oblysy.
