ەكسپەديسيا «جەتىسۋ ادالدىق الاڭى» جوبالىق كەڭسەسىنىڭ باستاماسىمەن جانە الماتى وبلىستىق اكىمدىگىنىڭ قولداۋىمەن جۇزەگە اسقان. تۇپكى ماقسات – وتاندىق ءتۋريزمدى ناسيحاتتاۋ ءارى سىبايلاس جەمقورلىققا قارسى مادەنيەت قالىپتاستىرۋ.
رەجيسەر ەرلان ۇشاقبايەۆ، ەكسترەمالدى سپورتشى ساكەن كاعاروۆ جانە بلوگەر اسەلينا سايلاۋمبەكوۆا باستاعان توپ الماتى وبلىسىنىڭ تالعار اۋدانىندا ورنالاسقان قارلىتاۋ شىڭىنا شىقتى. ولار 9 كۇن ىشىندە 5450 مەتر بيىكتىكتى ەڭسەرگەن.
– بيىل «جاستار جىلى» دەپ جاريالانعانى بىزدەردى قاتتى قۋانتتى. وسى ورايدا ەل اۋماعىندا ءارتۇرلى باعدارلامالار قولعا الىنىپ، جاڭا جوبالار جۇزەگە اسىرىلۋدا. باعدارلاما اياسىندا ءبىز دە اتسالىسۋدى ءجون سانادىق. ارينە، بيىكتىكتى باعىندىرۋ وڭايعا سوققان جوق. بيىكتىككە كوتەرىلگەن سايىن اۋا رايى وزگەرىپ، قولايسىزدىقتار دا تۋىندادى. الايدا ماقساتقا جەتۋگە شىدامدىلىق پەن شىمىرلىق جانە ءوزارا بەرەكە-بىرلىكتەرىمىز مۇرىندىق بولدى. قيىن دا بولسا قىزىقتى وتكەن ساپاردان قاناتتانا ورالدىق، – دەدى سپورتشى ساكەن كاعاروۆ.
جالپى، اۋەسقوي الپينيستەر توپ قۇرامىندا قازاقستاندىق بەينە بلوگەرلەر، ۆاينەرلەر، lifestyle وكىلدەرى مەن سپورتشىلار بار.
– الماتى وبلىسىندا «جەتىسۋ – ادالدىق الاڭى» اتتى مەكەمە قۇرىلعان. سول مەكەمە اياسىندا شىڭداردى باعىندىر جانە جەمقورلىقتان اۋلاق بول دەگەن جوبامەن بىرنەشە ءىس-شارالاردى ۇيىمداستىرۋدامىز. سونىمەن قاتار ەرەكشە اتاپ كەتەتىن دۇنيە الماتى وبلىسىنىڭ جاس مەملەكەتتىك قىزمەتشىلەرى «شىڭداردى باعىندىر» ۇرانىمەن الماتى كولىندەگى «ۇلكەن الماتى شىڭىن» جانە كەلەر جىلى كەڭ كولەمدە اتالىپ وتىلەتىن اباي قۇنانباي ۇلىنىڭ 175 جىلدىعىنا وراي «اباي شىڭىن» باعىندىرۋدى جوسپارلاپ وتىرمىز، – دەدى الماتى وبلىسىنىڭ ىشكى ساياسات باسقارماسىنىڭ باسشىسى رۋستام ءالي ۇلى.
بالجان جۇمانبەكوۆا، الماتى وبلىسى.
