QR Tuńǵysh prezidenti, Elbasy N.Á. Nazarbaev óz sózinde «Mádeniet – ulttyń bet-beinesi, rýhani bolmysy, aqyl-oiy, parasaty. Órkenietti ult eń aldymen tarihymen, mádenietimen, ultyn ulyqtaǵan uly tulǵalarymen, álemdik mádeniettiń altyn qoryna qosqan úlkendi-kishili úlesimen maqtanady. Sóitip, tek óziniń tól mádenieti arqyly ǵana basqaǵa tanylady» degen bolatyn.
Osyǵan orai, jastar jyly aiasynda ótkizilgen «JETISÝ ETNO STYLE» oblystyq jastar festivalinde tarih pen dástúr sabaqtasyp, kóshpeliler mádenietiniń aishyqty kórinisteri zamanaýi qoǵamda jarasymyn tapty.
Festivalǵa qatysý úshin Qaratal jaǵalaýyna oblystyń túkpir-túkpirinen 200-dei talantty jas jinaldy.
Jetisý jastarynyń aýqymdy sharasyn oblys ákimi A.Batalov ta tamashalady. Ónerpazdardyń ónerine tánti bolǵan oblys basshysy aldymen oqýshylardyń «Álqissa» kúiin tyńdap, Otan aldyndaǵy boryshyn ótep júrgen jastardyń áskeri sheberligin kórdi. Aimaqta alǵash ret qurylǵan «Mizam» jas ádebietshiler men eriktiler teatrynyń tusaýyn kesip, aq batasyn berdi.
– Jastar – qoǵamdaǵy eń belsendi býyn. Olardyń rýhani adamgershiligi, ǵylymdaǵy intellektisi, saiasi saýattylyǵy – táýelsiz eldiń jarqyn
bolashaǵynyń kepili. Sondyqtan memleketimizde jas býynnyń tegin bilim alýyna, shet tilderin úirenýine, tehnika tilin meńgerýine, jańa jobalarmen jumys isteýine tolyq múmkindik jasalyp otyr. Jalpy, oblysta jyl basynan beri jastar arasynda mádenietti damytý, salaýatty ómir saltyn nasihattaý baǵytynda 450 myń jasty qamtyǵan 1500-ge jýyq shara ótken bolatyn. Búgingi festival jastarǵa ári demalys, ári tárbie, ári ózara pikir almasý alańy retinde paidaly bolady dep esepteimin, – dei kele Amandyq Ǵabbasuly el ekonomikasyna súbeli úles qosyp júrgen aýdan jastaryn marapattady.
Taǵylymy men tálimi mol dástúrli sharany Almaty oblysynyń jastar saiasaty máseleler basqarmasy uiymdastyrdy.
– Ózderińiz de kórip otyrǵan shyǵarsyzdar, tarih pen dástúrdi qatar ushtastyra otyryp, ulttyq qundylyqtarymyzdy jastardyń boiyna sińirý maqsatynda osyndai sharany ótkizýdi qolǵa aldyq. Ár alańda ornalasqan buiymdardan qazaqtyń iisi shyǵyp tur. Osy oraida qoldaý tanytqany úshin oblys ákimine alǵysymdy bildirgim keledi. Sebebi jastar memlekettiń motory. Keleshektiń altyn kópirine arqaý bolar daryn ieleri. Sondyqtan bul festivaldiń bereri mol dep oilaimyn, – dedi Almaty oblystyq jastar saiasaty máseleleri jónindegi basqarmanyń basshysy Jomart Mandatuly.
Tartysty dodalar men qyzyqty kórinisterge toly shara sońy estrada juldyzdarynyń qatysýymen merekelik kontsertke ulasty.
Baljan JUMANBEKOVA, Almaty oblysy.
