ق ر تۇڭعىش پرەزيدەنتى، ەلباسى ن.ءا. نازاربايەۆ ءوز سوزىندە «مادەنيەت – ۇلتتىڭ بەت-بەينەسى، رۋحاني بولمىسى، اقىل-ويى، پاراساتى. وركەنيەتتى ۇلت ەڭ الدىمەن تاريحىمەن، مادەنيەتىمەن، ۇلتىن ۇلىقتاعان ۇلى تۇلعالارىمەن، الەمدىك مادەنيەتتىڭ التىن قورىنا قوسقان ۇلكەندى-كىشىلى ۇلەسىمەن ماقتانادى. ءسويتىپ، تەك ءوزىنىڭ ءتول مادەنيەتى ارقىلى عانا باسقاعا تانىلادى» دەگەن بولاتىن.
وسىعان وراي، جاستار جىلى اياسىندا وتكىزىلگەن «JETISÝ ETNO STYLE» وبلىستىق جاستار فەستيۆالىندە تاريح پەن ءداستۇر ساباقتاسىپ، كوشپەلىلەر مادەنيەتىنىڭ ايشىقتى كورىنىستەرى زاماناۋي قوعامدا جاراسىمىن تاپتى.
كىرەبەرىسى ساياساتكەرلەر ايماعىنان باستاۋ الاتىن الاڭنىڭ سوڭى قازاق ۇيلەرمەن جالعاسىن تاپقان. وزەندى كوبەلەي ورنالاسقان ۇلكەن كەرۋەننىڭ ىشىندە اسىق اتۋ، قول كۇرەس، جىلىك تارتىس، بالالار الاڭى، قولونەر بۇيىمدارىنىڭ كورمەسى، جاستار تەاترىنىڭ ايماعى، ارماندار تاقتاسى، سپورت الاڭى ورنالاسقان. كەرۋەننىڭ ىشىندە اۋداننان كەلگەن شارۋاشىلىق يەلەرى قوناقتارعا ارنايى قىمىز، شۇبات قۇيىپ، باۋىرساقتان ءدام تاتقىزدى. تالانتتى قولونەر شەبەرلەرى مەن زەرگەرلەر وزدەرىنىڭ كورمەلەرىن كورسەتىپ، كوپتىڭ كوڭىلىن باۋرادى.
فەستيۆالعا قاتىسۋ ءۇشىن قاراتال جاعالاۋىنا وبلىستىڭ تۇكپىر-تۇكپىرىنەن 200-دەي تالانتتى جاس جينالدى.
جەتىسۋ جاستارىنىڭ اۋقىمدى شاراسىن وبلىس اكىمى ا.باتالوۆ تا تاماشالادى. ونەرپازداردىڭ ونەرىنە ءتانتى بولعان وبلىس باسشىسى الدىمەن وقۋشىلاردىڭ «ءالقيسسا» كۇيىن تىڭداپ، وتان الدىنداعى بورىشىن وتەپ جۇرگەن جاستاردىڭ اسكەري شەبەرلىگىن كوردى. ايماقتا العاش رەت قۇرىلعان «ميزام» جاس ادەبيەتشىلەر مەن ەرىكتىلەر تەاترىنىڭ تۇساۋىن كەسىپ، اق باتاسىن بەردى.
– مەملەكەت باسشىسى قاسىم-جومارت كەمەل ۇلى توقايەۆ ءوز سوزىندە «ەلباسىمىز جاريا ەتكەن جاستار جىلىنىڭ ەڭ باستى ماقساتى – وسكەلەڭ ۇرپاقتىڭ بارىنشا ساپالى ءومىر سۇرۋىنە قاجەتتى جاعداي جاساۋ، جاستار – بۇل مەملەكەتىمىزدىڭ كۇش-قۋاتىن ەسەلەيتىن ەڭ نەگىزگى، مىقتى بۋىن ەكەنىن» اتاپ ءوتتى. وسى مەرەيلى جىلدا جەتىسۋ جەرىندە جاستار فەستيۆالىن وتكىزۋدىڭ ءبىز ءۇشىن ماڭىزى زور.
– جاستار – قوعامداعى ەڭ بەلسەندى بۋىن. ولاردىڭ رۋحاني ادامگەرشىلىگى، عىلىمداعى ينتەللەكتىسى، ساياسي ساۋاتتىلىعى – تاۋەلسىز ەلدىڭ جارقىن
بولاشاعىنىڭ كەپىلى. سوندىقتان مەملەكەتىمىزدە جاس بۋىننىڭ تەگىن ءبىلىم الۋىنا، شەت تىلدەرىن ۇيرەنۋىنە، تەحنيكا ءتىلىن مەڭگەرۋىنە، جاڭا جوبالارمەن جۇمىس ىستەۋىنە تولىق مۇمكىندىك جاسالىپ وتىر. جالپى، وبلىستا جىل باسىنان بەرى جاستار اراسىندا مادەنيەتتى دامىتۋ، سالاۋاتتى ءومىر سالتىن ناسيحاتتاۋ باعىتىندا 450 مىڭ جاستى قامتىعان 1500-گە جۋىق شارا وتكەن بولاتىن. بۇگىنگى فەستيۆال جاستارعا ءارى دەمالىس، ءارى تاربيە، ءارى ءوزارا پىكىر الماسۋ الاڭى رەتىندە پايدالى بولادى دەپ ەسەپتەيمىن، – دەي كەلە اماندىق عابباس ۇلى ەل ەكونوميكاسىنا سۇبەلى ۇلەس قوسىپ جۇرگەن اۋدان جاستارىن ماراپاتتادى.
تاعىلىمى مەن ءتالىمى مول ءداستۇرلى شارانى الماتى وبلىسىنىڭ جاستار ساياساتى ماسەلەلەر باسقارماسى ۇيىمداستىردى.
– وزدەرىڭىز دە كورىپ وتىرعان شىعارسىزدار، تاريح پەن ءداستۇردى قاتار ۇشتاستىرا وتىرىپ، ۇلتتىق قۇندىلىقتارىمىزدى جاستاردىڭ بويىنا ءسىڭىرۋ ماقساتىندا وسىنداي شارانى وتكىزۋدى قولعا الدىق. ءار الاڭدا ورنالاسقان بۇيىمداردان قازاقتىڭ ءيىسى شىعىپ تۇر. وسى ورايدا قولداۋ تانىتقانى ءۇشىن وبلىس اكىمىنە العىسىمدى بىلدىرگىم كەلەدى. سەبەبى جاستار مەملەكەتتىڭ موتورى. كەلەشەكتىڭ التىن كوپىرىنە ارقاۋ بولار دارىن يەلەرى. سوندىقتان بۇل فەستيۆالدىڭ بەرەرى مول دەپ ويلايمىن، – دەدى الماتى وبلىستىق جاستار ساياساتى ماسەلەلەرى جونىندەگى باسقارمانىڭ باسشىسى جومارت ماندات ۇلى.
تارتىستى دودالار مەن قىزىقتى كورىنىستەرگە تولى شارا سوڭى ەسترادا جۇلدىزدارىنىڭ قاتىسۋىمەن مەرەكەلىك كونسەرتكە ۇلاستى.
بالجان جۇمانبەكوۆا، الماتى وبلىسى.
