Bul týraly Qazaqstannyń syrtqy ister mınıstri Qaırat Ábdirahmanov málimdedi.
Buǵan deıin
Qytaı saıttarynda mektep oqýshylaryna Qazaqstannyń Jetisý, Almaty óńiri Qytaı jeri dep oqytylatyny týraly aqparat taraǵan bolatyn.
Bul másele qoǵamda biraz daý týdyrǵan edi. Osy jaǵdaı endi taǵy qaıtalanyp jatqanǵa uqsaıdy. Jýrnalıser syrtqy ister mınıstri Qaırat Ábdirahmanovtan osy máselege qatysty Qytaı úkimetine resmı saýal joldandy ma dep surady.
“Oqýlyq, kartaǵa baılanysty qandaı da bolsyn málimet tússe, biz ony eshqashan nazardan tys qaldyrmaımyz, naqty tosqaýyl qoıamyz.
Mundaı máselelerge óz aǵymymen júrýge múmkindik bermeımiz.
Ózderińizge málim, biz Qytaı tarapymen óte tyǵyz baılanystamyz, ekijaqty konsýltasıalar júrgizip jatyrmyz. Onyń ishinde jeltoqsanda Beıjińde ótken qaýipsizdik máseleleri týraly kelissózderdi aıtýǵa bolady. Jýyrda úkimetaralyq komısıa aıasynda birsypyra kelissóz ótkizemiz. Osyndaı úkimetaralyq kezdesýler arasynda mundaı málimet paıda bolsa, úkimet atynan kóteremiz. Oǵan eshqandaı kúmán bolmaýy kerek”, — dedi mınıstr.
Qytaıdaǵy qazaqtardyń týysqandary Qazaqstannan kómek surap otyr. Sondaı-aq Ábdirahmanov Qytaıda ustalǵan Qazaqstan azamattaryna qatysty da túsinikteme berdi. Aıtýynsha, mınıstrlik bul máseleni baqylaýynda ustap otyr.
“Ustalǵan azamattardyń týystary bizge qajetti málimetterdi berdi. Ol derekter rastalǵan soń, Qytaı tarapyna resmı túrde dıplomatıalyq nota jiberdik.
Sonymen qatar, Beıjińdegi elshiligimiz, Úrimshidegi pasporttyq-vızalyq qyzmettiń ókilderi Qytaı tarapymen tyǵyz jumys istep jatyr.
Tolyq málimet alǵan soń, biz ony mindetti túrde bizge ótinish bildirgen Qazaqstan azamattarynyń týystaryna jetkizemiz”, — dedi vedomstvo basshysy.
Derekkóz: sputniknews.kz
