بۇل تۋرالى قازاقستاننىڭ سىرتقى ىستەر ءمينيسترى قايرات ءابدىراحمانوۆ مالىمدەدى.
بۇعان دەيىن
جۇڭگو سايتتارىندا مەكتەپ وقۋشىلارىنا قازاقستاننىڭ جەتىسۋ، الماتى ءوڭىرى جۇڭگو جەرى دەپ وقىتىلاتىنى تۋرالى اقپارات تاراعان بولاتىن.
بۇل ماسەلە قوعامدا ءبىراز داۋ تۋدىرعان ەدى. وسى جاعداي ەندى تاعى قايتالانىپ جاتقانعا ۇقسايدى. جۋرناليستەر سىرتقى ىستەر ءمينيسترى قايرات ءابدىراحمانوۆتان وسى ماسەلەگە قاتىستى جۇڭگو ۇكىمەتىنە رەسمي ساۋال جولداندى ما دەپ سۇرادى.
“وقۋلىق، كارتاعا بايلانىستى قانداي دا بولسىن مالىمەت تۇسسە، ءبىز ونى ەشقاشان نازاردان تىس قالدىرمايمىز، ناقتى توسقاۋىل قويامىز.
مۇنداي ماسەلەلەرگە ءوز اعىمىمەن جۇرۋگە مۇمكىندىك بەرمەيمىز.
وزدەرىڭىزگە ءمالىم، ءبىز جۇڭگو تاراپىمەن وتە تىعىز بايلانىستامىز، ەكىجاقتى كونسۋلتاسيالار جۇرگىزىپ جاتىرمىز. ونىڭ ىشىندە جەلتوقساندا بەيجىڭدە وتكەن قاۋىپسىزدىك ماسەلەلەرى تۋرالى كەلىسسوزدەردى ايتۋعا بولادى. جۋىردا ۇكىمەتارالىق كوميسسيا اياسىندا ءبىرسىپىرا كەلىسسوز وتكىزەمىز. وسىنداي ۇكىمەتارالىق كەزدەسۋلەر اراسىندا مۇنداي مالىمەت پايدا بولسا، ۇكىمەت اتىنان كوتەرەمىز. وعان ەشقانداي كۇمان بولماۋى كەرەك”، — دەدى مينيستر.
قىتايداعى قازاقتاردىڭ تۋىسقاندارى قازاقستاننان كومەك سۇراپ وتىر. سونداي-اق ءابدىراحمانوۆ قىتايدا ۇستالعان قازاقستان ازاماتتارىنا قاتىستى دا تۇسىنىكتەمە بەردى. ايتۋىنشا، مينيسترلىك بۇل ماسەلەنى باقىلاۋىندا ۇستاپ وتىر.
“ۇستالعان ازاماتتاردىڭ تۋىستارى بىزگە قاجەتتى مالىمەتتەردى بەردى. ول دەرەكتەر راستالعان سوڭ، جۇڭگو تاراپىنا رەسمي تۇردە ديپلوماتيالىق نوتا جىبەردىك.
سونىمەن قاتار، بەيجىڭدەگى ەلشىلىگىمىز، ۇرىمشىدەگى پاسپورتتىق-ۆيزالىق قىزمەتتىڭ وكىلدەرى جۇڭگو تاراپىمەن تىعىز جۇمىس ىستەپ جاتىر.
تولىق مالىمەت العان سوڭ، ءبىز ونى مىندەتتى تۇردە بىزگە ءوتىنىش بىلدىرگەن قازاقستان ازاماتتارىنىڭ تۋىستارىنا جەتكىزەمىز”، — دەدى ۆەدومستۆو باسشىسى.
دەرەككوز: sputniknews.kz
