Búgin Óskemen qalasynda voleiboldan áielder komandalary arasynda Qazaqstannyń XXXIII chempionaty máresine jetip, finalda Shyǵys Qazaqstannyń «Berel» komandasynan basym túsken «Jetisý» komandasy el chempiony atandy. Sóitip «Jetisý» KVK Ulttyq liga sheberleriniń áielder voleibol komandalary arasynda 9 dúrkin chempion bolyp otyr, - dep habarlaidy Jetisý oblysy ákimi baspasóz qyzmeti.
Osylaisha «Jetisý» voleibol qyzdar komandary 2024-2025 jyldardaǵy maýsymda úshinshi jeńisine qol jetkizip otyr, iaǵni QR Chempionatyn toǵyzynshy ret, sol siiaqty Kýbogyn da toǵyzynshy márte, Sýperkýbokty tórtinshi márte utyp aldy. Sýperkýbok ielenýiniń arqasynda Filippinde 18-28 naýryzda ótetin voleiboldan klýbtar arasyndaǵy Aziia Chempionatyna joldama aldy.
Eske salsaq, Ulttyq liganyń voleiboldan áielder komandalary arasynda Qazaqstannyń 33-shi Chempionatynyń Plei-off oiyndary Óskemen qalasynda 1 naýryzda bastalǵan bolatyn. 6-7 naýryz kúnderi «Jetisý» aldymen «Turan» komandasyn eki márte jeńip finalǵa shyqqan edi. Finalda «Berel» komandasymen úsh oiyn ótkizdi. Búgingi sheshýshi oiynda qorytyndy esep 3:1, «Jetisýdyń» paidasyna sheshildi.
Osylaisha biylǵy chempionatta «Jetisý» komandasy altyn medalǵa ie bolyp, 9 dúrkin Qazaqstan chempiony atandy. Bul rette jeke nominatsiia boiynsha «Jetisý» komandasynan Daria Shargorodskaia úzdik bailanystyrýshy, Madina Beket úzdik qorǵaýshy atansa, jalpy chempionattyń úzdik oiynshysy Karina Denisova dep tanyldy.
Chempionat aiaqtalǵannan keiin «Jetisý» komandasynyń bas bapkeri Marko Grshich oi bólisti:
"Eń aldymen komanda oiynshylaryna rizamyn. Keshegiden keiin búgingi oiyn ońaiǵa túsken joq. Biraq bizdiń qyzdar óziniń myqtylyǵyn kórsetti. Bul rette bizdi sońyna deiin qoldaǵan jankúierlerimizge de alǵys bildirimemin. Bul maýsym – «Jetisý» komandasynyń maýsymy dep maqtanyshpen aita alamyz", - dedi ol.
Jalpy Taldyqorǵanda «Jetisý» voleibol kásibi klýbyna arnalǵan jattyǵý ortalyǵy jumys istep tur. Onda erler men áielder komandalary jáne jastardyń qosalqy quramy jattyǵady.
