Túrkistan oblysynyń ákimi Darhan Satybaldynyń tapsyrmasymen jibek klasterin damytýdyń jol kartasy ázirlenip, sharýalarǵa nesie berý baǵdarlamasy bekitildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jetisai aýdanynyń ákimi Serik Mamytovtyń bastamasymen aýdanda tut ósirý arqyly jibek qurtyn óndirý isi qolǵa alynyp, ótken jyly kórshiles Ózbekstan eliniń Andijan qalasynan ákelingen japondyq «Ashima» sortynyń alǵashqy 10 myń danasy egilgen bolatyn.
Biyl da bul jumys jalǵasyn taýyp, jibek klasterin damytý maqsatynda tut aǵashataryn otyrǵyzýǵa bolatyn aýdannyń teńgerimindegi 31,8 gektar jer qarastyrylyp otyr.
Jibek óndirisin damytýǵa qyzyǵýshylyq bildirgen 6 kásipker anyqtalyp qoldaǵy 52 gektar jerdiń búgingi tańda 25 gektar jerine tut egý jumystary júrgizilýde. Aýdan basshysy bekitilgen jumys kestesi aiasynda egistik alqapta bolyp, mamandarmen júzdesti.
Mamandar tut aǵashyn egý arqyly otbasylyq kásip ashyp, tabiǵaty qolaily óńirde 1 gektar jerge egilgen tut aǵashynyń japyraǵynan 2 mln teńgege deiin, al jibek qurtyn ósirý arqyly 1 gektar baýdan 4,5 mln teńgege deiin paida tabýǵa bolatynyn aitady. Eger bul ólkede osy kásip jappai qolǵa alynatyn bolsa ónimderdi Shyǵys Eýropa men Ońtústik Koreiaǵa, Qytaiǵa esh kedergisiz satýǵa bolatynyn alǵa tartady.
– Jibek – jibek qurtynan óndirilip, toqyma-mata ónerkásibinde paidalanylatyn tabiǵi talshyq. Ony óndirý – aýdan ekonomikasyn ary qarai damytýǵa mol septigin tigizedi. Óndirilgen ónimniń kelisin kórshiles Ózbekstandyq investorlar 600 teńgege deiingi baǵada satyp alatyndyqtaryn aitýda. Tabysymyzdy tek maqta nemese baqsha ónimderimen bailanystyrmai, tut egý arqyly jibek óndirip arttyrýǵa da bolady, – degen aýdan basshysy bul jumystardyń aldaǵy ýaqyttarda da toqtaýsyz jalǵasatynyn aitady.
Aita keteiik, buǵan deiin de otandyq jáne Ózbekstan elinen shaqyrylǵan tut sharýashylyǵy mamandary jergilikti sharýalarmen birneshe ret kezdesýler men seminar-keńester ótkizip, túsindirme jumystaryn júrgizýiniń nátijesinde aýdanynda jibek klasterin damytýǵa arnalǵan jalpy jer qory 83,8 gektardy qurap otyr.
