تۇركىستان وبلىسىنىڭ اكىمى دارحان ساتىبالدىنىڭ تاپسىرماسىمەن جىبەك كلاستەرىن دامىتۋدىڭ جول كارتاسى ازىرلەنىپ، شارۋالارعا نەسيە بەرۋ باعدارلاماسى بەكىتىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جەتىساي اۋدانىنىڭ اكىمى سەرىك مامىتوۆتىڭ باستاماسىمەن اۋداندا تۇت ءوسىرۋ ارقىلى جىبەك قۇرتىن ءوندىرۋ ءىسى قولعا الىنىپ، وتكەن جىلى كورشىلەس وزبەكستان ەلىنىڭ انديجان قالاسىنان اكەلىنگەن جاپوندىق «اشيما» سورتىنىڭ العاشقى 10 مىڭ داناسى ەگىلگەن بولاتىن.
بيىل دا بۇل جۇمىس جالعاسىن تاۋىپ، جىبەك كلاستەرىن دامىتۋ ماقساتىندا تۇت اعاشاتارىن وتىرعىزۋعا بولاتىن اۋداننىڭ تەڭگەرىمىندەگى 31،8 گەكتار جەر قاراستىرىلىپ وتىر.
جىبەك ءوندىرىسىن دامىتۋعا قىزىعۋشىلىق بىلدىرگەن 6 كاسىپكەر انىقتالىپ قولداعى 52 گەكتار جەردىڭ بۇگىنگى تاڭدا 25 گەكتار جەرىنە تۇت ەگۋ جۇمىستارى جۇرگىزىلۋدە. اۋدان باسشىسى بەكىتىلگەن جۇمىس كەستەسى اياسىندا ەگىستىك القاپتا بولىپ، ماماندارمەن جۇزدەستى.
ماماندار تۇت اعاشىن ەگۋ ارقىلى وتباسىلىق كاسىپ اشىپ، تابيعاتى قولايلى وڭىردە 1 گەكتار جەرگە ەگىلگەن تۇت اعاشىنىڭ جاپىراعىنان 2 ملن تەڭگەگە دەيىن، ال جىبەك قۇرتىن ءوسىرۋ ارقىلى 1 گەكتار باۋدان 4،5 ملن تەڭگەگە دەيىن پايدا تابۋعا بولاتىنىن ايتادى. ەگەر بۇل ولكەدە وسى كاسىپ جاپپاي قولعا الىناتىن بولسا ونىمدەردى شىعىس ەۋروپا مەن وڭتۇستىك كورەياعا، قىتايعا ەش كەدەرگىسىز ساتۋعا بولاتىنىن العا تارتادى.
– جىبەك – جىبەك قۇرتىنان ءوندىرىلىپ، توقىما-ماتا ونەركاسىبىندە پايدالانىلاتىن تابيعي تالشىق. ونى ءوندىرۋ – اۋدان ەكونوميكاسىن ارى قاراي دامىتۋعا مول سەپتىگىن تيگىزەدى. وندىرىلگەن ءونىمنىڭ كەلىسىن كورشىلەس وزبەكستاندىق ينۆەستورلار 600 تەڭگەگە دەيىنگى باعادا ساتىپ الاتىندىقتارىن ايتۋدا. تابىسىمىزدى تەك ماقتا نەمەسە باقشا ونىمدەرىمەن بايلانىستىرماي، تۇت ەگۋ ارقىلى جىبەك ءوندىرىپ ارتتىرۋعا دا بولادى، – دەگەن اۋدان باسشىسى بۇل جۇمىستاردىڭ الداعى ۋاقىتتاردا دا توقتاۋسىز جالعاساتىنىن ايتادى.
ايتا كەتەيىك، بۇعان دەيىن دە وتاندىق جانە وزبەكستان ەلىنەن شاقىرىلعان تۇت شارۋاشىلىعى ماماندارى جەرگىلىكتى شارۋالارمەن بىرنەشە رەت كەزدەسۋلەر مەن سەمينار-كەڭەستەر وتكىزىپ، تۇسىندىرمە جۇمىستارىن جۇرگىزۋىنىڭ ناتيجەسىندە اۋدانىندا جىبەك كلاستەرىن دامىتۋعا ارنالعان جالپى جەر قورى 83،8 گەكتاردى قۇراپ وتىر.
