Túrkistan oblysy, Jetisaı aýdanynda balyq sharýashylyǵy damýda. Búginde Jetisaıdyń balyǵy Ázerbaıjan, Grýzıa, Izraıl, Reseı, Qytaı jáne Ózbekstan elderine eksporttalyp, kásipkerler tabystaryn arttyryp keledi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Maqtaly aýyldyq okrýgine qarasty Sholpanqudyq dep atalatyn shaǵyn ǵana aýylda ornalasqan «Súndet» sharýa qojalyǵy dóńmańdaı (tolstolob), amýr, sazan syndy 1 mln 300 dana balyq shabaqtaryn óndirip, ósirýde.

Shabaqtarǵa qajetti jemdi Polsha elinen aldyrady.

Shekara asyp keletin jemniń quramynda balyqty túrli aýrý-syrqaýdan saqtaıtyn jáne ósip-jetilýine qajetti barlyq mıneraldar bar deıdi mamandar.

Memleket basshysy Qasym-Jomart Toqaev ótken jylǵy halyqqa Joldaýyn júzege asyrý aıasynda memleket tarapynan akvaósirýge paıdalanylatyn azyqty satyp alýǵa jumsalatyn shyǵyndardyń 30%-yn sýbsıdıalaý baǵdarlamasy balyq sharýashylyǵyn damytýǵa ońdy yqpalyn tıgizip keledi.

Aıta keteıik, memlekettik qoldaýdan qalys qalmaǵan óńirdiń balyq taýaryn óndirýshileri ónimderin Ázerbaıjan, Grýzıa, Izraıl, Reseı, Qytaı jáne Ózbekstan elderine eksporttap, tabystaryn arttyryp keledi.

Búginde jasandy balyq ósirý boıynsha elimizde kósh bastap turǵan Túrkistan oblysynda taýarly balyq ósirýge jaramdy 134 ózen-kól bar. Onyń ishinde 88-i jergilikti mańyzy bar sý aıdyny balyq sharýashylyǵy maqsatynda tabıǵat paıdalanýshylarǵa berilgen.