Jetisaidaǵy maqta terimine eriktilerden 32 brigada jumyldyryldy
Jiynǵa Jetisai aýdandyq máslihatynyń hatshysy Ádilhan Ýtanov, Jetisai aýdandyq ishki ister basqarmasynyń basshysy Baýyrjan Janaev, aýdan prokýrorynyń orynbasary Yrysbek Ernazarov, qala, kent jáne aýyl okrýginiń ákimderi, maqta óńdeý zaýyttarynyń basshylary men sharýa qojalyqtarynyń tóraǵalary qatysty.
Májiliste alǵash bop sóz alǵan Jetisai aýdany ákiminiń orynbasary Asan Mahanbetov jinalǵandarǵa búgingi maqta terý naýqanynyń barysyn baiandady. Onyń aitýynsha, qazirdiń ózinde aýdanda qol terim jumystaryna eriktilerden quralǵan 32 brigada jumyldyrylypty. Alaida bul jetkiliksiz. Sondyqtan Jetisai qalasy men Asyqata kentiniń turǵyndary arasynan jumyssyzdardy tartý máselesi kóterildi. Osy rette aýdan basshysy qala men kent ákimderine jumyssyz azamattardy qoǵamdyq jumysqa kóptep jumyldyrýdy júktedi. Bul óz kezeginde maqta terimge shetten keletinderdiń qarasyn azaityp, negizgi tabysty jergilikti jerde alyp qalýǵa septigin tigizbek. Sonymen qatar, óńir basshysy aýyl okrýgteriniń ákimderine maqta terim naýqany týraly statistikalyq málimetterdi kúndelikti berip otyrýdy júktedi.
Resmi málimetterge súiensek, búginde Jetisai aýdanynda 187 kombain maqta terimine saqadai sai tur. Onyń 77-si «Djon-Dir» kombaindary. Sondai-aq, 900-ge jýyq traktor men qosymsha tirkemeler ázirlenýde. Budan bólek, aýdanǵa qarasty 11 aýyl okrýgi ákimderine sharýalarǵa qajetti janar-jaǵarmai talondary úlestirilip berilgen. Biylǵy kúzgi naýqan men jer jyrtý jumystaryna shamamen 9415 tonnadai janar-jaǵarmai jaǵý josparda bar.
Jiyn barysynda maqta óńdeý zaýytynyń basshylary da óz oilaryn ortaǵa saldy. Olar sharýalardy qol terimdi taza ári uqypty ótkizýge shaqyrdy. Bul óz kezeginde maqtany taza salmaqta ótkizip, naqty paidaǵa keneleýdiń joly retinde qarastyrylyp otyr.
Májiliste biylǵy maqta baǵasyna alańdaǵan sharýa qojalyǵynyń basshylary da sóz qozǵady. Olar eń aldymen maqta zaýyttaryndaǵy tarazynyń «tazalyǵyn» tekserip shyǵarýdy surandy. Ózekti máselege orai aýdan ákimi Jamantai Qanaiulynyń bastamasymen óńirge tarazy tekseretin arnaiy mamandar shaqyrtylýda. Budan bólek, tarazydan másele týyndaǵan jaǵdai bolsa, arnaiy mobildi top qurylatyny belgili boldy. Sondai-aq sharýalarǵa maqta ótkizer aldynda zaýyttarmen kelisimshart jasasyp alýǵa keńes berildi.
Jetisai aýdany ákiminiń baspasóz qyzmeti
