Jetisaida táýligine 30 tonna taýyq etin óndiretin fabrikanyń qurylysy bastalady
Jetisai aýdanynda qurylǵan indýstrialdy aimaqta aǵymdaǵy jyly «Adal Agro Group» JShS-i jalpy quny 2,8 mlrd teńgege jylyna 9 myń tonna ónim óndiretin «Siyr etin óńdeý tsehynyń» qurylysyn bastaidy. Sondai-aq, biyl táýligine 30 tonna et óndiretin atalǵan seriktestiktiń «Qus fabrikasynyń» qurylysy júredi. Sonymen qatar, seriktestiktiń jalpy quny 7,6 mlrd teńgelik «Júgeriden krahmal-sirne ónimin jáne limon qyshqylynyń óndirisi» jobasyn iske qosý jumystary júredi. Bul týraly Jetisai aýdanynyń ákimi Murat Qadyrbek málimdedi, – dep habarlaidy Dalanews.kz.
Onyń aitýynsha, aýdandaǵy óńirlik ónim kólemi biyl 4 aida 11 mlrd 421,5 mln teńgeni quraǵan.
– Jetisai aýdanyndaǵy ónerkásip óniminiń kólemi biyl qańtar-sáýir ailary boiynsha 1 mlrd 882,1 mln teńgege jetti. Atalǵan kezeńde negizgi kapitalǵa tartylǵan investitsiia kólemi 1 mlrd 177,2 mln teńgeni qurady. Al shaǵyn jáne orta kásipkerlik sýbektileriniń ónim kólemi 3,6 mlrd tenge. Sondai-aq, 2021 jyldyń 4 aiynda 5 mlrd 756,3 mln teńgeniń aýyl sharýashylyǵy ónimi óndirilgen, – dedi Murat Bolatuly.
Infraqurylymmen qamtý boiynsha aýdandaǵy qala, kent jáne aýyldyq okrýgterge qarasty 113 eldi mekeniń 103-i ortalyqtandyrylǵyn aýyz sýmen qamtylǵan. Al gazdandyrý salasynda 113 eldi mekenniń 54-i gazben qamtylǵan, bul aýdandaǵy eldi mekenderdiń jalpy sanynyń - 47,7%. Sonymen qatar, aýdandaǵy ishki kóshelerdiń jalpy uzyndyǵy 899,1 shaqyrym, onyń ishinde 661,1 shaqyrymy – asfalt, 227 shaqyrymy – shaǵal tas, 11 shaqyrymy – topyraq jol. 2021 jyly sýbventsiia jáne jergilikti biýdjet esebinen bólingen 445 mln teńgege jalpy uzyndyǵy 25,7 shaqyrymdy quraityn 32 kóshege orta jóndeý jumystary júrgizilýde.
