Túrkistan oblysynda ótken jyly jalpy memleket esebinen qurylysy bastalǵan 33 mekteptiń 20-sy paidalanýǵa berilse, al 13 mektep biyl tapsyrylatyn bolady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
«Jaily mektep» ulttyq jobasy aiasynda 2023-2025 jyldary Túrkistan oblysyndla 49 myń oqýshyǵa shaqtalǵan 63 mekteptiń qurylysy júrgizilip, 2025-jylǵa deiin óńirde 96 bilim oshaǵy boi kóteretin bolady. Bul elimizdegi eń úlken kórsetkish.
«Jaily mektep» ulttyq jobasy Memleket basshysy Qasym-Jomart Toqaevtyń tapsyrmasymen júzege asyrylýda. Atalǵan joba aiasynda biyl Jetisai aýdanynda 6 mektep salynady.
Atap aitsaq, Jetisai qalasynan 1500 oryndyq, Asyqata kentinen 900 oryndyq jáne Yntymaq aýyldyq okrýginiń Aqniet eldi mekeninen 600 oryndyq mektepterdiń qurylysy ótken jyly bastalsa, biylǵy jyly Jetisai qalasynan 900 oryndyq jáne Sh.Dildábekov aýyldyq okrýginiń Qyzyltań eldi mekeninen 600 oryndyq, Qyzylqum aýyldyq okrýginiń Qyzylqum eldi mekeninen 600 oryndyq bilim oshaqtarynyń qurylysy bastalyp, 2025 jyly qoldanysqa tapsyrylady dep kútilýde.
Pándik kabinettermen, onyń ishinde robototehnika, keń jolaqty internet, jańa modifikatsiialanǵan kabinettermen jabdyqtalatyn mektepterde oqýshylardyń sapaly bilim alýlaryna, joǵary jáne birinshi sanatty muǵalimder quramynyń paiyzdyq úlesin, pedagogikalyq qyzmetkerlerdiń biliktilikterin arttyrýǵa tolyqtai jaǵdai jasalmaq.
Jetisai aýdanynyń ákimi Serik Mamytov «Jaily mektep» Ulttyq jobasy aiasynda qurylysy júrgizilip jatqan bilim berý nysandaryn aralap, jumystardyń barysymen tanysty.
