Jetisai aýdanyna qarasty Atameken aýyldyq okrýgindegi «Pavel» sharýa qojalyǵy óziniń ieligindegi 9 gektar egistikke 20 jyldan beri baqsha daqyldaryn egip keledi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Biylǵy jyly da qarbyzdyń erekshe kútimdi qajet etetin «Viktoriia» sortyn sáýir aiynyń basynda ekken. Qajetti agrotehnikalyq sharalardyń der kezinde jasalýynyń nátijesinde pisip jetilgen qarbyzdan oidaǵydai ónim alynady dep josparlanyp otyr. Aǵyn sýdy únemdeý maqsatynda engizilgen tamshylatyp sýǵarý ádisi ónimniń artýyna da septigin tigizip otyr.
– Alǵashqy ónimdi qazir Reseige jiberip jatyrmyz. Keiin suranysqa qarai ózge de óńirlerge jiberemiz. Jyldaǵydan shyǵyn kóp bolǵanymen baǵasy da oidaǵydai, kelisin 150-170 teńge aralyǵynda satyp jatyrmyz. Tamshylatyp sýǵarý ádisin qoldanatyndyqtan aǵyn sýdan, mineraldy tyńaitqyshtardan qiyndyq kórmedik. Ónimdilik te oidaǵydai, – deidi sharýa qojalyq tóraǵasy Asan Mýbinov.
Jetisailyq sharýalar biylǵy jyly 79,3 myń gektar sýarmaly jerdiń 40,8 myń gektaryna maqta shitin sepse, 20,1 myń gektar jerge baqsha, 7,2 myń gektar jerge dándik júgeri, 3,3 myń ga jerge kókónis pen 6,3 myń gektar jerge jońyshqa daqylyn ekken.
Aýdandaǵy 20,1 myń gektarǵa egilgen baqsha daqyldarynyń 4 myń gektary qarbyz. Biylǵy jyly 600 myń tonnadan astam baqsha ónimderi jinalady dep josparlanyp otyr. Byltyrǵy jyly da baqsha daqyldarynan oidaǵydai ónim alynyp, oblysta úzdikterdiń qatarynan kórindi.
Aita keteiik, «Pavel» sharýa qojalyǵy ieligindegi egistik alqaptaryna qarbyzdan bólek baklajan men bolgar buryshyn, qyzanaq syndy baqsha ónimderin egip, jergilikti tutynýshylarǵa tiimdi baǵada satýda. Jylyjai jumysyn da durys jolǵa qoiǵan.
