Aýdanda jaiylym jerdiń tarlyǵyna qaramastan sharýalar jylqy basyn kóbeitýdiń ózindik esebin taýyp otyr. Solardyń biri – Maqtaly aýyl okrýgi Jailaýkól eldimekenindegi «S-Tastanata» sharýa qojalyǵy. Búginde qojalyq qorasynda 50 bas jylqy bordaqylanýda.
Qojalyq tóraǵasy Sovet Musaevtyń bul kásipke bet burǵanyna 7-8 jyldyń júzi bolypty. Qazirgi tańda «S-Tastanata» sharýa qojalyǵynda 60-qa jýyq jylqy bar. Mal basyn odan ári kóbeitýge aýyldaǵy úiirgelik jerlerdiń kadastrlyq nómeriniń joqtyǵy qolbailaý bolyp otyr eken.
«Jylqy sanyn jyl sanap arttyryp, tipti 100-den asyryp jiberýge bolady. Alaida shekara irgesinde ornalasqan aýylymyzda jaiylymdyq jer joq. Onyń ústine, úiirgelik jerimizdiń kadastrlyq nómeri áli kúnge berilmei otyr. Eger aýdan, aýyl ákimdikteri úiirgelik jerimizdi kartaǵa engizip, zańdastyryp berse, jylyna 100 shaqty jylqyny bordaqylap, aýdanymyzdy jylqy etimen qamtamasyz etip otyrýǵa shamamyz jetedi», — deidi Sovet Tastanuly.
Budan bólek, munda quny 45 mln teńgege para-par 5 kókpar aty baptalýda. «Kókpar atyn ustaý — meniń hobbiim» ,- deidi Sovet Tastanuly. Máselen, ońtústik jurtyna «Raketa» laqapatymen tanymal tulpary túrkimenniń «Aqalteke» tuqymymen bodandastyrylǵan eken. 6 jasar aiǵyr búginde ońtústik jerindegi úlken kókparlarda olja salyp júr.
«Bul tulparym jýyrda ǵana úlken kókpardan oljaly oraldy. Qazirgi tańda baby men baǵy qatar janyp júr. «Sat» dep jatqandardyń qatary kún sanap artýda. Men bul tulparymdy 10 mln teńge usynsa da satpaimyn»,- deidi qojalyq tóraǵasy.
