Almatyda «Ádilet» partiiasy men Almaty qalasy Bilim basqarmasynyń Dene shynyqtyrý jáne sport oqý-tájiribelik ortalyǵynyń birlesip uiymdastyrýymen, Almaty qalasy máslihatynyń depýtaty Dosbol Jylqybaevtyń qoldaýymen «Teń múmkindikter» inkliýzivti sport festivali ótti, dep habarlaidy dalanews.kz.
Festivaldiń negizgi maqsaty - inkliýzivti sportty damytý, balalardyń sportpen shuǵyldanýyna teń jaǵdai jasaý jáne olardyń qabiletterin shyńdaýǵa múmkindik berý. Jarysqa qatysýshylar bochcha, jeńil atletika jáne «Biz jeńimpaz bolamyz» sporttyq estafetasynda baq synady.
Jyl saiyn ótkiziletin respýblikalyq balalar inkliýzivti sport festivali 3-4, 5-6 jáne 7-8-synyp oqýshylary arasynda uiymdastyrylady. Ony daiyndaý men ótkizýge Qazaqstan Respýblikasy Oqý-aǵartý ministrliginiń Ulttyq ǵylymi-praktikalyq dene tárbiesi ortalyǵy, «Ádilet» partiiasynyń Áielder qanaty, Saiasi menedjment akademiiasy, partiianyń Ortalyq apparatynyń Saiasi jumys departamenti, «Teń múmkindikter álemi» qoǵamdyq qory, Qazaqstan bochcha federatsiiasy, sondai-aq bilim jáne sport basqarmalary men sporttyq infraqurylym nysandarynyń ókilderi kiretin uiymdastyrý komiteti jalpy basshylyq jasaidy.
Festivaldiń basty ereksheligi - erekshe bilim berý qajettilikteri bar balalar men olardyń qatarlastarynyń bir alańda teń dárejede jarysýy. Atap aitqanda, sporttyq saiystarǵa kórý, estý, sóileý qabiletterinde, tirek-qimyl apparaty men ziiatkerlik damýynda erekshelikteri bar balalar da qatysady. Mundai format balalardyń ózara qarym-qatynas ornatýyna, jańa dostar tabýyna, bir-birine qoldaý kórsetýine jáne tyń jetistikterge umtylýyna múmkindik beredi. Is-shara aiasynda beiimdelgen jáne inkliýzivti sport sektsiialaryn damytý, erekshe bilim berý qajettilikteri bar balalardyń básekelestik rýhyn qalyptastyrý, ózine degen senimin arttyrý jáne qabiletterin júzege asyrýǵa yntalandyrý máselelerine basymdyq beriledi.
Erekshe qajettilikteri bar balalardy qoldaý elimizdiń áleýmettik saiasatyndaǵy mańyzdy baǵyttardyń biri sanalady. Memleket basshysy Qasym-Jomart Toqaev árbir balanyń damýyna teń múmkindik beretin jaǵdai jasaý qajettigin birneshe ret atap ótken bolatyn. «Teń múmkindikter» festivali de osy mindetti júzege asyrýǵa baǵyttalǵan.
Is-sharaǵa qatysqan Almaty qalasy máslihatynyń depýtaty Dosbol Jylqybaev inkliýzivti sportty damytýdyń jáne ár balanyń óz múmkindigin júzege asyrýyna jaǵdai jasaýdyń mańyzdylyǵyna toqtaldy.
«Ár bala óz qabiletin tanytyp, sportpen ainalysýǵa jáne jeńiske umtylýǵa laiyq. Bizdiń mindetimiz - olardyń múmkindikterin shektemei, kerisinshe, óz áleýetin ashýyna jaǵdai jasaý. «Teń múmkindikter» festivali - osy baǵyttaǵy mańyzdy bastamalardyń biri. Mundai is-sharalar balalardyń ózine degen senimin arttyryp, jańa jetistikterge jetýine jol ashady», - dedi Dosbol Jylqybaev.
Jarys qorytyndysy boiynsha úzdik komandalar marapattalyp, qatysýshylarǵa arnaiy syilyqtar tabystaldy. Qalalyq kezeńde birinshi oryn alǵan jeńimpaz komandalar respýblikalyq deńgeidegi jarysta Almaty qalasynyń namysyn qorǵaityn bolady.
Uiymdastyrýshylardyń aitýynsha, «Teń múmkindikter» festivali aldaǵy ýaqytta da jalǵasyn taýyp, inkliýzivti sportty qoldaýǵa jáne balalardyń sporttyq áleýetin damytýǵa baǵyttalǵan dástúrli is-shara retinde ótkizile bermek.
