West Oil Software kompaniiasy Mańǵystaý oblysy Jetibai kentinde jumysshylardyń narazylyǵyna bailanysty málimdeme jasap, narazylardyń qoiǵan talaptarynyń oryndalýyna qarsy ekenin bildirdi.
Kompaniia jumysshylardyń "QazMunaiGaz" (QMG) quramyna ótkizý jáne jalaqyny "QazMunaiGazdyń" eńbekaqysyna júiesine sai teńestirý týraly talaptary oryndalmaidy dep otyr.
Jetibai kentinde West Oil Software jumysshylary bir aptadan beri narazylyqqa shyǵyp tur. Jumysshylar West Oil kompaniiasyn QMG-nyń merdigeri Oil Transport corporation (OTK) balansyna qosý, biryńǵai tólem júiesin engizý jáne materialdyq-tehnikalyq bazany jańartýdy talap etedi.
West Oil Software málimdemesinde ujymdyq sharttyń jáne eńbek zańnamasynyń talaptaryn tolyq oryndap otyrǵanyn, jumysshylarǵa beretin eńbekaqy basqa munai servis kásiporyndarynyń jalaqysynan artyq ekenin aitady.
West Oil Software málimdemesinde "OTK kompaniiasymen 2027 jylǵa deiin jasalǵan uzaq merzimdi kelisimshart boiynsha óz mindettemelerin ereýilge shyqqan jumysshylardyń qatysýymen, bolmasa olarsyz tolyq kólemde oryndaýǵa nietti" dedi.
West Oil Software jumysshylardyń ereýilin "zańsyz" dep atap, ereýilge bailanysty "munai uńǵymalarynda apat qaýpi bar, bul qorshaǵan ortaǵa jáne azamattardyń densaýlyǵyna ziian keltirýi múmkin, sondai-aq tapsyrys berýshige ekonomikalyq shyǵyn keltiredi" dep málimdedi.
Jetibaidaǵy narazylyqqa shamamen 500 adam qatysyp jatyr. Narazylar qaqaǵan aiazda kúni-túni dalada tur. Olar talaptary oryndalmaiynsha taramaitynyn aitady. 17 jeltoqsanda Jetibaiǵa arnaiy jasaq kirgizilgeni habarlanǵan. Narazylyqtan soń jumysshylarǵa qysym kúsheiip, birneshe adam jumystan shyǵarylǵany da habarlanǵan.
Narazylyqqa shyqqan jumysshylar 2018 jylǵa deiin QMG quramyna kiretin kompaniiada jumys istep, QMG-nyń birińǵai eńbekaqy tólem júiesine engen edi. Keiin bul kompaniia QMG quramynan shyǵyp, jekeshelendirilgen.
