Ózgelerge úlgi bolar bastama arqyly aýdandaǵy 11 aýyldyq okrýgtegi 51 eldi mekenge jaqyn ornalasqan qajetti jaiylym jer kartasy ázirlendi. Osy kartaǵa engizilgen 310 jer paidalanýshy zańdy tulǵa anyqtaldy.
Tabys tabýdy ǵana emes, tatýlyq pen halyqtyń jaiylym jerge qatysty muqtajdyǵyn sheshýge atsalysqan jer ieleri ár aýyl aýmaǵy boiynsha jasalǵan kartaǵa engen jaiylym alqaptardy el igiligi úshin berýge kelisti.
Atap aitqanda, Alǵabas aýyl okrýginen Álibek Shirikbaev – 139 gektar, Bilisbek Qasymbekov – 79 gektar, Kókterek aýyl okrýginen Dihanbai Dúisenbek – 195 gektar jaiylym jerdi el igiligi úshin aýdandyq jer qoryna qaitardy (barlyǵy 413 ga). Al Boraldai aýyl okrýginde fermerler odaǵynyń tóraǵasy, «Dihan-A» ÓK direktory Myrzabek Arebaev, «Janys» ÓK direktory Sadyq Áljanov, «Tómengi Boraldai» ÓK direktory Seiil Qasymbetov aýyl mańynan 7 shaqyrymǵa deiingi aimaqta jatqan jerdi elge tabystady.
Sonymen qatar 2022 jyldyń 11 aqpanynda aýdan ákimdigi men aýdandyq prokýratýranyń birlesken jiynynda ózge de azamattar ózderine tiesili jerdi halyqtyń paidalanýyna qarsy emestigin, qujattaryn rásimdep, turǵyndarǵa paidalanýǵa tapsyratyny týraly aityp ótti.
Eldi mekenge jaqyn tusta mal jaiylymy úshin qaitarylyp jatqan jer telimderin jinaqtap, olardy sol eldi mekenniń ortaq jaiylym jerine bekitý úshin aýdan ákimdiginde tiisti qaýly jobasy ázirlendi.
Elimizde jyldar boiy sheshimin tappai otyrǵan ózekti jáne negizgi suraqtardyń biri – eldi mekenderde jaiylym jer tapshylyǵy. Jaiylym jer máselesin sheshý baǵytynda Qazaqstan Respýblikasy Prezidenti men Bas prokýrory tarapynan tapsyrmalar berilgen. Báidibek aýdanynda osy baǵytta naqty jumys bar. Bul bastama arqyly jergilikti turǵyndardyń boiyna senim uialatyp, el birligi nyǵaia tústi.
