وزگەلەرگە ۇلگى بولار باستاما ارقىلى اۋدانداعى 11 اۋىلدىق وكرۋگتەگى 51 ەلدى مەكەنگە جاقىن ورنالاسقان قاجەتتى جايىلىم جەر كارتاسى ازىرلەندى. وسى كارتاعا ەنگىزىلگەن 310 جەر پايدالانۋشى زاڭدى تۇلعا انىقتالدى.
تابىس تابۋدى عانا ەمەس، تاتۋلىق پەن حالىقتىڭ جايىلىم جەرگە قاتىستى مۇقتاجدىعىن شەشۋگە اتسالىسقان جەر يەلەرى ءار اۋىل اۋماعى بويىنشا جاسالعان كارتاعا ەنگەن جايىلىم القاپتاردى ەل يگىلىگى ءۇشىن بەرۋگە كەلىستى.
اتاپ ايتقاندا، العاباس اۋىل وكرۋگىنەن الىبەك شىرىكبايەۆ – 139 گەكتار، بىلىسبەك قاسىمبەكوۆ – 79 گەكتار، كوكتەرەك اۋىل وكرۋگىنەن ديحانباي دۇيسەنبەك – 195 گەكتار جايىلىم جەردى ەل يگىلىگى ءۇشىن اۋداندىق جەر قورىنا قايتاردى (بارلىعى 413 گا). ال بورالداي اۋىل وكرۋگىندە فەرمەرلەر وداعىنىڭ ءتوراعاسى، «ديحان-ا» وك ديرەكتورى مىرزابەك ارەبايەۆ، «جانىس» وك ديرەكتورى سادىق ءالجانوۆ، «تومەنگى بورالداي» وك ديرەكتورى سەيىل قاسىمبەتوۆ اۋىل ماڭىنان 7 شاقىرىمعا دەيىنگى ايماقتا جاتقان جەردى ەلگە تابىستادى.
سونىمەن قاتار 2022 جىلدىڭ 11 اقپانىندا اۋدان اكىمدىگى مەن اۋداندىق پروكۋراتۋرانىڭ بىرلەسكەن جيىنىندا وزگە دە ازاماتتار وزدەرىنە تيەسىلى جەردى حالىقتىڭ پايدالانۋىنا قارسى ەمەستىگىن، قۇجاتتارىن راسىمدەپ، تۇرعىندارعا پايدالانۋعا تاپسىراتىنى تۋرالى ايتىپ ءوتتى.
ەلدى مەكەنگە جاقىن تۇستا مال جايىلىمى ءۇشىن قايتارىلىپ جاتقان جەر تەلىمدەرىن جيناقتاپ، ولاردى سول ەلدى مەكەننىڭ ورتاق جايىلىم جەرىنە بەكىتۋ ءۇشىن اۋدان اكىمدىگىندە ءتيىستى قاۋلى جوباسى ازىرلەندى.
ەلىمىزدە جىلدار بويى شەشىمىن تاپپاي وتىرعان وزەكتى جانە نەگىزگى سۇراقتاردىڭ ءبىرى – ەلدى مەكەندەردە جايىلىم جەر تاپشىلىعى. جايىلىم جەر ماسەلەسىن شەشۋ باعىتىندا قازاقستان رەسپۋبليكاسى پرەزيدەنتى مەن باس پروكۋرورى تاراپىنان تاپسىرمالار بەرىلگەن. بايدىبەك اۋدانىندا وسى باعىتتا ناقتى جۇمىس بار. بۇل باستاما ارقىلى جەرگىلىكتى تۇرعىنداردىڭ بويىنا سەنىم ۇيالاتىپ، ەل بىرلىگى نىعايا ءتۇستى.
