Belgili zańger Aiman Ýmarova jańa Ata zańnyń jobasyndaǵy til men jer týraly baptarǵa pikirin aityp, jelidegi dúrbeleń týǵyzatyn habarlamalarǵa senbeýge shaqyrdy, dep habarlaidy Dalanews.kz.
Zańger til týraly taqyrypty qozǵaǵanda diskriminatsiiaǵa jol berilmeý keregin airyqsha atap ótti.
«Kei adamdar tek qana qazaq tili – memlekettik til retinde jazylýy kerektigin aityp júr. Árine, ana tilimizdiń mártebesi joǵary, solai bolýy da kerek. Biraq bul jerde halyqaralyq konventsiialardy alatyn bolsaq, diskriminatsiia degen másele bar. Qai jerge barsań da, mysaly Amerikada ispan tilinde sóileseńiz, olarǵa eshkim «ispansha sóilegenińiz úshin jumysqa almaimyz» demeidi. Túsinesiz be? Bul jerde kim qai tilde sóilegisi keledi, sol tilde sóileidi. Biraq álbette, aǵylshyn tilin bilmegenderdiń ózine qiynyraq bolady», – dedi Aaiman Ýmarova Instagram jelisinde jańa Konstitýtsiiany talqylaý jónindegi tikelei transliatsiiada.
Zańger óz elimizde de Keńes zamanynda týǵan, áli qazaqsha sóilei almaityn azamattarymyz bar ekenin eske saldy.
«Eger qazir biz qazaq tilinde sóilei almaityn qazaqtarǵa «endi bári tek qazaqsha bolady» desek, olarǵa diskriminatsiia bolady. Sony túsiný kerek. Ýaqyt ótedi, ýaqyt ótken soń, kishkene de bolsa ózgerister ornai bastaidy. Dál qazir muny jasaý qiyn, sebebi diskriminatsiia jasaý – múldem durys emes», – deidi Aiman Ýmarova.
Sonymen birge, spiker jańa Konstitýtsiiada jer týraly da eshbir ózgeris engizilmegenin aityp, qaýeset sózderge senbeýge shaqyrdy.
«Jelide kóptegen qoldanýshy «jerimiz satylatyn boldy» dep dúrbeleń týǵyzýda. Meniń aitarym – eshkimge senbeńizder. Myna jerde men naqty qarap otyrmyn, jer týraly eshqandai ózgeris joq. Jer týraly ózgeris bolady degendi eshkimnen estigen joqpyn. Qazirgi Konstitýtsiiada qalai jazylsa, týra solai qaldyrylǵan. Jer týraly eshkim eshnárse dep jatqan joq», – dep sózin túiindedi Aiman Ýmarova.
