Jaqynda memlekettik satyp alýlar portaly arqyly Sátbaev ákimdigi 78,5 mln teńgege áleýmettik serial túsirý týraly kelisim-shart jasasqany belgili boldy. Tapsyrys bir kózden, eshqandai konkýrssyz "ErNar-Media" kompaniiasyna berilgen. Bul serial negizinen jemqorlyq pen alaiaqtyqqa qarsy kúresti nasihattaýǵa tiis edi. Bul týraly memlekettik satyp alý týraly zertteitin Goszakupturaly arnasy jazdy, dep habarlaidy Dalanews.kz.
Málimetke súiensek, kelisim-sharttyń negizi retinde ákimdik "intellektýaldy menshik" degen sebepti alǵa tartqan. Bul negizdeme memlekettik satyp alý protsesiniń jabyq, kúmándi túrde ótýine múmkindik berip otyr. Biraq tapsyrys berýshi dál qandai intellektýaldy menshik nysany ekenin ashyp kórsetpegen.
"ErNar-Media" kompaniiasy memlekettik satyp alýǵa alǵash ret 2024 jyly naýryzda qatysqan. Oǵan alǵashqy tikelei tapsyrysty Ulytaý oblysynyń Qoǵamdyq damý basqarmasy bergen. Bul kompaniianyń direktory Erkebulan Moldashev – Ulytaý oblysy máslihatynyń depýtaty, "AMANAT" partiiasynyń múshesi", - dep jazylǵan aqparatta.
2024 jyly shildede Sátbaev qalasynyń ákimi bolyp Murat Bóribaev taǵaiyndaldy. Buǵan deiin ol da Ulytaý oblystyq máslihatynyń depýtaty bolǵan. Derekke súiensek, serial túsiretin kompaniianyń basshysy men qala ákimi – burynǵy áriptester.
"Aita keterlik taǵy bir jait – kompaniianyń zańdy iesi Erkebulan Moldashev emes. Ol tek kompaniia basshysy retinde tirkelgen. Kompaniianyń quryltaishysy – basqa adam. Biraq memlekettik satyp alý portaly boiynsha bul quryltaishynyń serial óndirisimen esh qatysy joq. Ol buǵan deiin jaryqtandyrý, aǵash buiymdaryn jasaý, mektep ǵimaratyn jóndeý, túrli tehnikalyq quraldardy satýmen ainalysqan. Demek kompaniianyń iesi men basshysynyń arasynda naqty qandai kelisim bary belgisiz", - dep jazylǵan aqparatta.
Bul serial nege dál osy kompaniiaǵa berilgeni jaily ashyq aqparat joq. Mundai jaǵdai, árine, qoǵamda úlken kúdik pen saýal týǵyzady.
Eske salaiyq, buǵan deiin BAQ-ta Sátbaevta depýtattyń kompaniiasy serial túsirýge 78,5 mln teńgelik tender utyp alǵany týraly aqparat tarady.
