"Astana LRT" burynǵy basshysy Talǵat Ardan Astana qalasynyń qylmystyq ister jónindegi aýdanaralyq sotynyń úkimin qaita qaraýǵa shaǵym túsirdi. Alaida onyń apelliatsiialyq shaǵymy aqtalmady, dep habarlaidy Dalanews.kz.
“Astana qalasynyń qylmystyq ister jónindegi aýdanaralyq sotynyń 2024 jylǵy 11 qarashadaǵy úkimimen Ardan T. aýyr saldarǵa alyp kelgen qyzmettik ókilettikterin qyzmet múddelerine qaishy paidalaný faktisi boiynsha (QK 361-baby 4-bóliginiń 3) tarmaǵy) boiynsha kináli dep tanyldy (syrttai). Ardan T. buryn 2023 jylǵy 3 mamyrdaǵy úkimmen QK 189-baby 4-bóliginiń 2) tarmaǵy boiynsha 7 jylǵa bas bostandyǵynan aiyrylǵan, qylmystyq quqyq buzýshylyqtar jiyntyǵy boiynsha memlekettik qyzmette jáne kvazimemlekettik sektor sýbektilerinde qyzmet atqarý quqyǵynan ómir boiyna aiyryla otyryp, túpkilikti 9 jylǵa bas bostandyǵynan aiyrylǵan”, — delingen habarlamada.
Onyń “Astana LRT” JShS basqarma tóraǵasy qyzmetin atqara otyryp, iaǵni memlekettik fýnktsiialardy oryndaýǵa ýákilettik berilgen adamdarǵa teńestirilgen tulǵa bola otyryp, LRT qurylysy jónindegi jobany iske asyrýdy buzǵanyn, nátijesinde buryn Qytaidyń memlekettik damý bankinen alynǵan 257,6 mln dollaryn, iaǵni 85,9 mlrd teńgege balamaly (QRUB 2016 jylǵy jeltoqsandaǵy valiýtalardyń resmi baǵamyna sáikes) “Astana LRT” JShS qaitarmaǵan jáne ol tiisinshe nysanaly maqsaty boiynsha paidalanylmaǵan.
“Osylaisha Ardan T. qyzmet múddelerine qaishy, laýazymdyq ókilettikterin asyra paidalanyp, nátijesinde onyń zańsyz áreketteri “City transportation systems” JShS-ne asa iri mólsherde, iaǵni 85,9 mlrd teńge somaǵa materialdyq zalal keltirý túrindegi aýyr zardaptarǵa ákep soqtyrdy”, — delingen sot habarlamasynda.
Sot úkimimen kelispegen sottalýshynyń advokaty apelliatsiialyq shaǵym túsirip, ony aqtaýdy surady.
Alaida Astana qalalyq sotynyń qylmystyq ister jónindegi sot alqasynyń 2024 jylǵy 25 jeltoqsandaǵy qaýlysymen sot úkimi ózgerissiz qalyp, apelliatsiialyq shaǵym qanaǵattandyrylmady.
“Óitkeni sottalǵannyń kinási jábirlenýshi ókiliniń, kýágerlerdiń aiǵaqtarymen, saraptamalardyń qorytyndylarymen jáne basqa da materialdarmen dáleldendi. Sot aktisi zańdy kúshine endi”, — dedi sot ókilderi.
Eske salaiyq, buǵan deiin Astana LRT JShS-nyń burynǵy basqarma tóraǵasy Talǵat Ardanǵa qatysty úkim shyqqan edi. Bul týraly Dalanews.kz Tengrinews.kz-ke siltep habarlady.
Sottalýshyǵa halyqaralyq izdeý jariialanǵan, sondyqtan onyń qatysýynsyz syrttai qaraldy.
2016 jylǵy 22 jeltoqsanda LRT JShS-nyń burynǵy basqarma tóraǵasy Talǵat Ardan qyzmettiń múddelerine qaishy laýazymdyq ókiletin teris paidalanyp, naqty qajettiliksiz LRT qurylys jobasy boiynsha Qytaidyń memlekettik damý bankinen syrtqy qaryzdyń birinshi transhy retinde 257,6 million AQSh dollaryn zańsyz suratqan. Qarajat túsken sátten bastap olar joba boiynsha paidalanylmaǵan.
2018 jylǵy 26 qarashada Almaty qalasynyń mamandandyrylǵan aýdanaralyq ekonomikalyq sotynyń sheshimimen banktiń qyzmeti májbúrli túrde toqtatyldy. Osylaisha, bul jobany iske asyrý buzyldy, QMDB-nen alynǵan qaryz qarajaty JShS-ǵa qaitarylmady jáne aqshalai qarajat nysanaly maqsaty boiynsha paidalanylmai, City transportation systems JShS-na 85 milliard teńgeden astam shyǵyn keltirgendikten, onyń áreketteri aýyr saldarǵa alyp keldi.
Sondai-aq A. buryn Astana qalasynyń qylmystyq ister jónindegi mamandandyrylǵan aýdanaralyq sotynyń 03.05.2023 jylǵy úkimimen asa iri mólsherinde biýdjet qarajatyn talan-tarajǵa salǵany úshin (QK 189-baby 4-bóliginiń 2-tarmaǵy) syrttai memlekettik qyzmette qyzmet atqarý quqyǵynan ómir boiyna aiyryla otyryp, 7 jylǵa bas bostandyǵynan aiyryldy.
"Sot úkimimen Ardan QK 361-baby 4-bóliginiń 3-tarmaǵy boiynsha kináli dep tanylyp, 4 jyl 8 aiǵa bas bostandyǵynan aiyryldy jáne QK 58-babynyń 6-bóligi qoldanylyp, sottyń 03.05.2023 jylǵy úkimi boiynsha taǵaiyndalǵan jazany ishinara qosý arqyly túpkilikti memlekettik qyzmette qyzmet atqarý quqyǵynan ómir boiyna aiyra otyryp, 9 jylǵa bas bostandyǵynan aiyrý jazasy taǵaiyndaldy. Sonymen qatar Ardannan City transportation systems JShS-nyń paidasyna 85 milliard teńgeden astam materialdyq shyǵyn óndirildi", - dep jazylǵan sottyń baspasóz qyzmeti taratqan habarlamada.
Is boiynsha JShS alǵan memlekettik qaryz, shart boiynsha baqylaý júzege asyrylmaǵandyqtan, QR Qarjy ministrligi tarapynan laýazymdy tulǵalardyń nemquraily faktisi boiynsha prokýrordyń atyna jekeshe qaýly shyǵaryldy.
