Jeltoqsannan bastap qytaılyq temirjolshylar Qazaqstanda turyp, jumys isteı alady, dep habarlaıdy Dalanews.kz.
Qazaqstan men Qytaı shekara mańyndaǵy temirjol stansıalarynda vahtalyq qyzmetkerlerdi bir-biriniń aýmaǵynda ornalastyrýǵa kelisti. Bul kelisim «Qazaqstan temir joly» ulttyq kompanıasy (QTJ) men Qytaı temir joldary arasynda jasaldy.
Kelisim týraly aqparatty buǵan deıin QTJ-nyń baspasóz qyzmeti habarlaǵan. Onda bul sheshim Qazaqstan men Qytaı arasyndaǵy shekara ótkelderiniń jumys tıimdiligin arttyrý úshin qabyldanǵany atap ótilgen.
«Dostyq jáne Altynkól stansıalarynda QHR-dyń vahtalyq qyzmetkerlerin ornalastyrýǵa arnalǵan ǵımarattardy jóndeý jáne jańǵyrtý jumystary aıaqtaldy. Qytaı mamandarynyń qaýipsiz jumys isteýi men jaıly turýy úshin barlyq jaǵdaı jasaldy», – dep málimdedi QTJ.
Ulttyq kompanıanyń baspasóz qyzmetiniń málimetinshe, kelisimderdi iske asyrý qazirgi shekteýlerdi joıýǵa, ákimshilik rásimderden ótýdi tezdetýge, shekara stansıalarynyń ótkizý qabiletin arttyrýǵa, júk qujattaryn óńdeý ýaqytyn qysqartýǵa jáne Qazaqstan men Qytaı arasyndaǵy temirjol salasyndaǵy yntymaqtastyqty odan ári damytýǵa múmkindik beredi.
QTJ sonymen qatar eki eldiń vahtalyq qyzmetkerleriniń kórshiles stansıalarǵa kelýi 2025 jylǵy jeltoqsanǵa josparlanǵanyn naqtylady.
