Jeltoqsan aiynan bastap jol erejesin buzǵan júrgizýshilerge salynatyn aiyppuldar mólsheri aitarlyqtai kóbeiedi, - dep habarlaidy Dalanews.kz.
Jańa ákimshilik kodeks ózgeristeri kúshine enedi, alaida sarapshylar bul sharalardyń zańbuzýshylyqtar sanyn qysqartatynyna senimsiz.
Eki aidan keiin saǵatyna 60 shaqyrymnan joǵary jyldamdyqty asyrǵan júrgizýshiler 40 AEK kóleminde, iaǵni 147 myń teńge aiyppul tóleitin bolady. Qaitalanǵan jaǵdaida bul soma 221 myń teńgege deiin artady. Qazirgi ýaqytta mundai zańbuzýshylyqtar úshin aiyppul mólsheri 73 myń teńgeni quraidy.
Táýelsiz avtokólik odaǵynyń tóraǵasy Edýard Edokov aiyppuldyń kóbeiýin qoldaitynyn aitady. Onyń pikirinshe, jyldamdyqty 5 shaqyrymǵa deiin asyryp jiberý baiqalmai qalýy múmkin, alaida norma 40 shaqyrym bolǵanda, 100 shaqyrymmen júrý anyq zańbuzýshylyq dep esepteledi. Al basqa sarapshylar aiyppul somasynyń artýy buzýshylyqtarǵa áser etpeidi dep sanaidy. Olardyń aitýynsha, 73 myń teńge aiyppuldan qoryqpaǵan adam 147 myń teńgege de alańdamaidy, sebebi mundai zańbuzýshylyqtardy kóbine materialdyq jaǵdaiy jaqsy adamdar jasaidy. Buǵan qosa, olar júrgizýshi kýáliginen aiyrý men alǵashqy 7 kúndegi 50% jeńildik múmkindigin alyp tastaýdy usynady.
"Za rýlem" jýrnalynyń bas redaktory Aleksei Alekseev bolsa, injenerlik sheshimderge mán berý kerek dep esepteidi. Onyń aitýynsha, qalada joǵary jyldamdyqpen júrýge múmkindik jasamaý qajet. Mysaly, qiylystarda jasandy taryltýlar ornatý jáne qaýipti ýchaskeler kartasyn jasaý sekildi sharalar júrgizýshilerdiń tártip buzýyna tosqaýyl bolýy múmkin.
