Qazaqstannyń tuńǵysh prezidenti Nursultan Nazarbaev álemdegi eń dáýletti 10 kóshbasshynyń qataryna endi. Bul týraly Brandvm.com usynǵan saraptamalyq materialda aitylǵan, dep habarlaidy Dalanews.kz.
Forbes málimetinshe, Qazaqstandy 30 jylǵa jýyq basqarǵan Nazarbaevtyń jeke dáýleti 1–2 milliard dollar kóleminde dep baǵalanǵan. Onyń tabysy negizinen otbasy músheleriniń bank sektoryndaǵy úlesteri, jyljymaityn múlik jáne energetikalyq aktivtermen tyǵyz bailanysty dep kórsetiledi. Uzaq jyldar boiy memlekettik kásiporyndardy baqylaýy jáne otbasylyq biznesiniń damýy Nazarbaevtyń qarjylai qýatyn nyǵaitýǵa jol ashqan.
"Qazaqstandy Keńes odaǵynan keiin munaiǵa bai memleketke ainaldyrǵan Nazarbaevtyń uzaq jylǵy biligi onyń qarjylai jáne saiasi yqpalyn kúsheitýge tikelei áser etti. Otbasynyń banktik júie men energetika salalaryndaǵy belsendiligi onyń bailyǵynyń negizgi kózi sanalady", — delingen zertteýde.
Nazarbaev tizimde Resei prezidenti Vladimir Pýtin (200 mlrd dollarǵa deiin), Brýnei sultany Hassanal Bolkiah (50 mlrd dollar), BAÁ premer-ministri ári Dýbai bileýshisi sheih Muhammed ibn Rashid Ál Maktým (20 mlrd dollar) siiaqty álemdik deńgeidegi iri saiasatkerlermen birge atalady.
Sarapshylardyń pikirinshe, bailyǵy milliardpen esepteletin saiasatkerler qatarynda Nazarbaevtyń bolýy Ortalyq Aziia elderindegi saiasi-ekonomikalyq biliktiń bir tulǵa qolynda shoǵyrlanýynyń aiqyn kórinisi. Nazarbaevtyń otbasylyq imperiiasy memlekettiń strategiialyq resýrstaryn tiimdi paidalanýy arqyly paidaǵa kenelgeni atap kórsetilgen.
Material avtorlary Nazarbaevtan bólek Italiianyń burynǵy premer-ministri, mediamagnat Silvio Berlýskoni (7–8 mlrd dollar), AQSh-tyń eks-prezidenti Donald Tramp (5,1 mlrd dollar) jáne Tailandtyń burynǵy premeri Taksin Chinavattyń (1,6 mlrd dollar) da jeke kapitalyn atap ótedi.
"Saiasattaǵy joǵary laýazym men orasan zor bailyq jii birge júredi. Prezidentter men premer-ministrlerdiń kóbi bilikke deiin sonshalyqty aýqatty bolmaǵanymen, qyzmetin paidalanyp, qarjylyq múmkindikterin eselegen", – delingen saraptamanyń qorytyndysynda.
Nazarbaevtyń esimi bul tizimge enýi Qazaqstandaǵy bilik pen qarjynyń ózara kirigýiniń jarqyn mysaly retinde kórsetilgen.
