قازاقستاننىڭ تۇڭعىش پرەزيدەنتى نۇرسۇلتان نازاربايەۆ الەمدەگى ەڭ داۋلەتتى 10 كوشباسشىنىڭ قاتارىنا ەندى. بۇل تۋرالى Brandvm.com ۇسىنعان ساراپتامالىق ماتەريالدا ايتىلعان، دەپ حابارلايدى Dalanews.kz.
Forbes مالىمەتىنشە، قازاقستاندى 30 جىلعا جۋىق باسقارعان نازاربايەۆتىڭ جەكە داۋلەتى 1–2 ميلليارد دوللار كولەمىندە دەپ باعالانعان. ونىڭ تابىسى نەگىزىنەن وتباسى مۇشەلەرىنىڭ بانك سەكتورىنداعى ۇلەستەرى، جىلجىمايتىن مۇلىك جانە ەنەرگەتيكالىق اكتيۆتەرمەن تىعىز بايلانىستى دەپ كورسەتىلەدى. ۇزاق جىلدار بويى مەملەكەتتىك كاسىپورىنداردى باقىلاۋى جانە وتباسىلىق بيزنەسىنىڭ دامۋى نازاربايەۆتىڭ قارجىلاي قۋاتىن نىعايتۋعا جول اشقان.
"قازاقستاندى كەڭەس وداعىنان كەيىن مۇنايعا باي مەملەكەتكە اينالدىرعان نازاربايەۆتىڭ ۇزاق جىلعى بيلىگى ونىڭ قارجىلاي جانە ساياسي ىقپالىن كۇشەيتۋگە تىكەلەي اسەر ەتتى. وتباسىنىڭ بانكتىك جۇيە مەن ەنەرگەتيكا سالالارىنداعى بەلسەندىلىگى ونىڭ بايلىعىنىڭ نەگىزگى كوزى سانالادى"، — دەلىنگەن زەرتتەۋدە.
نازاربايەۆ تىزىمدە رەسەي پرەزيدەنتى ۆلاديمير پۋتين (200 ملرد دوللارعا دەيىن)، برۋنەي سۇلتانى حاسسانال بولكياح (50 ملرد دوللار)، ءباا پرەمەر-مينيسترى ءارى دۋباي بيلەۋشىسى شەيح مۇحاممەد يبن راشيد ءال ماكتۋم (20 ملرد دوللار) سياقتى الەمدىك دەڭگەيدەگى ءىرى ساياساتكەرلەرمەن بىرگە اتالادى.
ساراپشىلاردىڭ پىكىرىنشە، بايلىعى ميللياردپەن ەسەپتەلەتىن ساياساتكەرلەر قاتارىندا نازاربايەۆتىڭ بولۋى ورتالىق ازيا ەلدەرىندەگى ساياسي-ەكونوميكالىق بيلىكتىڭ ءبىر تۇلعا قولىندا شوعىرلانۋىنىڭ ايقىن كورىنىسى. نازاربايەۆتىڭ وتباسىلىق يمپەرياسى مەملەكەتتىڭ ستراتەگيالىق رەسۋرستارىن ءتيىمدى پايدالانۋى ارقىلى پايداعا كەنەلگەنى اتاپ كورسەتىلگەن.
ماتەريال اۆتورلارى نازاربايەۆتان بولەك يتاليانىڭ بۇرىنعى پرەمەر-مينيسترى، مەدياماگنات سيلۆيو بەرلۋسكوني (7–8 ملرد دوللار)، اقش-تىڭ ەكس-پرەزيدەنتى دونالد ترامپ (5،1 ملرد دوللار) جانە تايلاندتىڭ بۇرىنعى پرەمەرى تاكسين چيناۆاتتىڭ (1،6 ملرد دوللار) دا جەكە كاپيتالىن اتاپ وتەدى.
"ساياساتتاعى جوعارى لاۋازىم مەن وراسان زور بايلىق ءجيى بىرگە جۇرەدى. پرەزيدەنتتەر مەن پرەمەر-مينيسترلەردىڭ كوبى بيلىككە دەيىن سونشالىقتى اۋقاتتى بولماعانىمەن، قىزمەتىن پايدالانىپ، قارجىلىق مۇمكىندىكتەرىن ەسەلەگەن"، – دەلىنگەن ساراپتامانىڭ قورىتىندىسىندا.
نازاربايەۆتىڭ ەسىمى بۇل تىزىمگە ەنۋى قازاقستانداعى بيلىك پەن قارجىنىڭ ءوزارا كىرىگۋىنىڭ جارقىن مىسالى رەتىندە كورسەتىلگەن.
