Qazaqstanda bilim berý salasyndaǵy eń iri ári aýqymdy bastamalardyń biri – «Keleshek mektepteri» ulttyq jobasy júzege asyrylyp jatyr. Joba aiasynda zamanaýi, sapaly ári jaily bilim berý keńistikteri boi kóterip, qala men aýyl arasyndaǵy bilim sapasynyń alshaqtyǵyn joiýǵa baǵyttalǵan naqty qadamdar jasalýda,- dep habarlaidy Dalanews.kz
Memleket basshysynyń tapsyrmasymen qolǵa alynǵan «Keleshek mektepteri» jobasy 2023 jyly bastalǵan bolatyn. Eki jyl ishinde respýblika boiynsha 217 jańa mektep salý josparlanǵan. Onyń ishinde:
-
2024 jyldyń qorytyndysy boiynsha – 105 mektep salyndy;
-
2025 jyldyń sońyna deiin – taǵy 112 mektep paidalanýǵa beriledi;
-
Nátijesinde qosymsha 460 myń oqýshy orny ashylady.
Mektepterdiń jartysynan astamy aýyldyq óńirlerde ornalasqan. Bul – 200 myńnan astam aýyl balasynyń zamanaýi infraqurylymy bar mektepterde oqýyna múmkindik beredi.
Keleshek mektebiniń ereksheligi nede?
Jańa mektepter tek ǵimarat qana emes, bilim berýdiń jańa modeline negizdelgen ortalyqtar bolmaq. Joba aiasyndaǵy bilim oshaqtarynyń artyqshylyqtary:
-
Mektep aýmaǵy burynǵy tiptik jobalardan 15–20%-ǵa keń;
-
Tehnikalyq jabdyqtalýy 4 esege artyq;
-
Ár mektepte robototehnika kabinetteri, STEM-zerthanalar, horeografiia zaldary, kovorking aimaqtary men tórt sport zalǵa deiin qarastyrylǵan;
-
Bastaýysh jáne joǵary synyptar úshin jeke bloktar qarastyrylǵan;
-
Barlyq nysandar qaýipsizdik talaptaryna sai jabdyqtalyp, zamanaýi jihazben tolyqtyrylǵan.
"Men osy mektepte oqitynyma óte qýanyshtymyn. Mektebimiz úlken, jaryq jáne taza. Ásirese, kitaphana men IT kabineti qatty unaidy. Úzilis kezinde dostarymmen kovorking aimaǵynda otyramyz. Jazda da mektep bos turmaidy – robototehnika úiirmesine qatysyp júrmin. Munda oqyǵan óte qyzyq ári yńǵaily", - deidi 6-synyp oqýshysy Aiarý Ábilqasym.
Meirambek Qanatuly, ata-ana:
"Qyzym №32 mekteptiń 3-synybynda oqidy. Bul – jańa formattaǵy, naǵyz zamanaýi bilim ordasy. Synyptar keń, jaryq ári balanyń oi-órisin damytýǵa qajetti quraldarmen jabdyqtalǵan. Muǵalimder de bilikti, balamen jumys isteýde erekshe tásil qoldanady. Ata-ana retinde biz de mekteppen tyǵyz bailanystamyz. Mundai mektepterdiń sany kóbeise, elimizdiń bolashaǵy jarqyn bolatynyna senemin".
Jas mamandarǵa jol ashyq
«Keleshek mektepteri» jobasy aiasynda jas pedagogterdi qoldaýǵa da erekshe nazar aýdarylyp otyr. QR Oqý-aǵartý ministriniń 2025 jylǵy 31 naýryzdaǵy №57 buiryǵyna sáikes, jas mamandar enbek.kz platformasy arqyly konkýrs negizinde jumysqa qabyldanady.
Ár mektepte tálimgerlik jáne beiimdelý baǵdarlamalary engizilip, jańadan kelgen muǵalimge tájiribeli ustaz baǵyt-baǵdar beredi.
«Jas mamandardy qoldaý – el bolashaǵyna salynǵan investitsiia. Bul – jai ǵana mektep emes, bilimdi urpaqtyń, senimdi ustazdardyń negizi qalanatyn orda», – dedi Oqý-aǵartý ministri Ǵani Beisembaev.
Qala men aýyl arasyndaǵy alshaqtyq joiylady
Joba aiasynda aýyl men qala arasyndaǵy bilim sapasynyń teńdigi qamtamasyz etilýde. Buryn sapaly infraqurylym tek qalalyq mektepterdiń enshisinde bolsa, endi aýyl balalary da birdei múmkindikterge ie bola alady.
«Bul – jaily ǵimarattar salý ǵana emes. Bul – keleshekti qalyptastyratyn, ulttyń intellektýaldyq irgetasyn qalaityn mańyzdy bastama», – dedi ministr.
«Keleshek mektepteri» jobasy – Qazaqstannyń bilim berý salasyn jańǵyrtý jolyndaǵy batyl ári naqty qadam. Jańa formattaǵy mektepter jas urpaqqa sapaly bilim alýǵa, al muǵalimderge kásibi ortada damýǵa múmkindik beredi. Bul – bilimge degen betburystyń naqty belgisi.
