Qazaqstanda energetika salasynda 4,5 myń maman jetispeidi. Sarapshylar maman tapshylyǵy týrasynda ne deidi? Dalanews.kz tarqatady.
Smaiylov Energetika ministrligin ne úshin sókti?
Qazaqstanda elektr energetikasy salasyndaǵy memlekettik saiasatty iske asyrý tiimdiligine júrgizilgen aýdit aiaqtaldy. Onyń qorytyndylary Álihan Smaiylovtyń tóraǵalyǵymen ótken Joǵarǵy aýditorlyq palatanyń otyrysynda qaraldy.
Aýditorlyq is-sharalar Energetika ministrligin; "Samuryq-Energo" AQ; "KEGOC" AQ; "Elektr energiiasy men qýaty naryǵynyń qazaqstandyq operatory" AQ; "Jańartylatyn energiia kózderin qoldaý jónindegi qarjy-esep aiyrysý ortalyǵy" JShS jáne basqa da uiymdardy qamtydy.
Qarjy máselesinen bólek, bul sala betpe-bet kelip otyrǵan ózekti máseleler ataldy.
"Energetika salasyndaǵy negizgi problemalardyń biri – salanyń damýy úshin belgilengen josparlar men is-sharalardyń oryndalmaýy. Atap aitqanda, tarif saiasatynyń ashyqtyǵyn qamtamasyz etý, aktivterdi jańǵyrtý jáne t.b. Sala áli de sheteldik jabdyqqa táýeldi", - dep jazylǵan habarlamada.
Taǵy bir túitkildi másele - maman jetispeýi.
"Salada shamamen 4,5 myń maman jetispeidi. Negizgi sebepteri – jastardyń qyzyǵýshylyǵynyń tómendigi jáne jalaqynyń azdyǵy", - dep jazylǵan habarlamada.
Sarapshy pikiri
Saiasattanýshy Ǵaziz Ábishevtiń pikirinshe, eldiń tehnikalyq kadrlyq qurylymy kóz aldymyzda quldyrap barady.
"Halyq sany ósip keledi, biraq negizgi mamandardyń - matematika muǵalimderiniń, dárigerlerdiń, injenerlerdiń tapshylyǵy da artyp keledi. Bul tek memlekettik saiasat saldary emes. Memleketimiz naryqtyq ekonomika úshin buryn-sońdy bolmaǵan kólemde bilim berý granttaryn bólip otyr. Alaida nege ekeni belgisiz, jurt tehnikalyq mamandyqtardy tańdaýǵa qulyqsyz, ol salalarda jumys isteýge, elge paida ákelýge ynta baiqatpaidy. Infraqurylymdy ustap turǵan bilikti kadrlar tapshylyǵy shekten shyqqan deńgeige jetkende kúireý kezeńi bastalady", - dedi sarapshy.
