قازاقستاندا ەنەرگەتيكا سالاسىندا 4،5 مىڭ مامان جەتىسپەيدى. ساراپشىلار مامان تاپشىلىعى تۋراسىندا نە دەيدى؟ Dalanews.kz تارقاتادى.
سمايىلوۆ ەنەرگەتيكا مينيسترلىگىن نە ءۇشىن سوكتى؟
قازاقستاندا ەلەكتر ەنەرگەتيكاسى سالاسىنداعى مەملەكەتتىك ساياساتتى ىسكە اسىرۋ تيىمدىلىگىنە جۇرگىزىلگەن اۋديت اياقتالدى. ونىڭ قورىتىندىلارى ءاليحان سمايىلوۆتىڭ توراعالىعىمەن وتكەن جوعارعى اۋديتورلىق پالاتانىڭ وتىرىسىندا قارالدى.
اۋديتورلىق ءىس-شارالار ەنەرگەتيكا مينيسترلىگىن؛ "سامۇرىق-ەنەرگو" اق؛ "KEGOC" اق؛ "ەلەكتر ەنەرگياسى مەن قۋاتى نارىعىنىڭ قازاقستاندىق وپەراتورى" اق؛ "جاڭارتىلاتىن ەنەرگيا كوزدەرىن قولداۋ جونىندەگى قارجى-ەسەپ ايىرىسۋ ورتالىعى" ج ش س جانە باسقا دا ۇيىمداردى قامتىدى.
قارجى ماسەلەسىنەن بولەك، بۇل سالا بەتپە-بەت كەلىپ وتىرعان وزەكتى ماسەلەلەر اتالدى.
"ەنەرگەتيكا سالاسىنداعى نەگىزگى پروبلەمالاردىڭ ءبىرى – سالانىڭ دامۋى ءۇشىن بەلگىلەنگەن جوسپارلار مەن ءىس-شارالاردىڭ ورىندالماۋى. اتاپ ايتقاندا، تاريف ساياساتىنىڭ اشىقتىعىن قامتاماسىز ەتۋ، اكتيۆتەردى جاڭعىرتۋ جانە ت.ب. سالا ءالى دە شەتەلدىك جابدىققا تاۋەلدى"، - دەپ جازىلعان حابارلامادا.
تاعى ءبىر تۇيتكىلدى ماسەلە - مامان جەتىسپەۋى.
"سالادا شامامەن 4،5 مىڭ مامان جەتىسپەيدى. نەگىزگى سەبەپتەرى – جاستاردىڭ قىزىعۋشىلىعىنىڭ تومەندىگى جانە جالاقىنىڭ ازدىعى"، - دەپ جازىلعان حابارلامادا.
ساراپشى پىكىرى
ساياساتتانۋشى عازيز ابىشيەۆتىڭ پىكىرىنشە، ەلدىڭ تەحنيكالىق كادرلىق قۇرىلىمى كوز الدىمىزدا قۇلدىراپ بارادى.
"حالىق سانى ءوسىپ كەلەدى، ءبىراق نەگىزگى مامانداردىڭ - ماتەماتيكا مۇعالىمدەرىنىڭ، دارىگەرلەردىڭ، ينجەنەرلەردىڭ تاپشىلىعى دا ارتىپ كەلەدى. بۇل تەك مەملەكەتتىك ساياسات سالدارى ەمەس. مەملەكەتىمىز نارىقتىق ەكونوميكا ءۇشىن بۇرىن-سوڭدى بولماعان كولەمدە ءبىلىم بەرۋ گرانتتارىن ءبولىپ وتىر. الايدا نەگە ەكەنى بەلگىسىز، جۇرت تەحنيكالىق ماماندىقتاردى تاڭداۋعا قۇلىقسىز، ول سالالاردا جۇمىس ىستەۋگە، ەلگە پايدا اكەلۋگە ىنتا بايقاتپايدى. ينفراقۇرىلىمدى ۇستاپ تۇرعان بىلىكتى كادرلار تاپشىلىعى شەكتەن شىققان دەڭگەيگە جەتكەندە كۇيرەۋ كەزەڭى باستالادى"، - دەدى ساراپشى.
