Abaı atyndaǵy ortalyqta STEAM JasSpace jasóspirimder men jastarǵa arnalǵan keńistiktiń ashylý saltanaty ótti. Bul shara «JasSpace: Atyraý q. jastaryn damytý bastamasy» baǵdarlamasyn iske asyrý maqsatynda Atyraý oblysy ákimdigi, Oblystyq bilim berý basqarmasy, «Shevron» kompanıasy, jáne «Ortalyq Azıanyń Eýrazıa Qory» KQ arasyndaǵy yntymaqtastyq týraly Memorandýmǵa qol qoıýǵa oraılastyryldy.
Baǵdarlamanyń maqsaty – JasSpace keńistiginiń aınalasynda STEAM baǵyttary boıynsha jastardy oqytýdy qamtamasyz etetin jáne osy salalardaǵy kásipterdiń tanymal bolýyna yqpal etetin ekojúıeni qurý.
Atyraý oblysy ákiminiń orynbasary Taýshov Narıman Bahytulynyń aıtýynsha, bul ortalyq el men qoǵamnyń damýynda ǵana emes, sondaı-aq keıingi urpaqtardy tárbıeleýde de úlken ról atqarady. «Oblys ákiminiń atynan, qoǵam atynan «Shevron» kompanıasyna osy ortalyqty qurýǵa tikeleı qatysqany úshin rızashylyǵymyzdy bildiremiz.
Atyraý oblysynyń balalary men jastary Abaı ortalyǵynyń JasSpace keńistiginde jańa tehnologıalardy meńgeredi jáne bolashaqta osy joba aıasynda daıyndyqtan ótken jastar tehnıkalyq bilimdi qajet etetin aımaqtyń iri mekemeleriniń jumysyna yqpal etedi dep úmittenemin», – dep tolyqtyrdy Taýshov myrza.
STEAM JasSpace keńistigi – bul jastar men jasóspirimderge arnalǵan ınovasıalyq jobalar men baǵdarlamalar alańy.
STEAM boıynsha bilim berý ǵylym, tehnologıa, ınjenerıa, óner jáne matematıka (STEAM – Science, Technology, Engineering, Art and Mathematics) sıaqty salalarda bir ýaqytta daǵdylardy damyta otyryp, oqytýdyń ıntegrasıalanǵan jáne pánaralyq ádisine negizdelgen.
«Shevron» kompanıasy Abaı atyndaǵy ortalyqtyń qurylysyna qatysty. Endi ortalyqta STEAM bilim berýdi damytýǵa kómektesý – biz úshin úlken mártebe. «Shevron» birqatar bilim berý, kásibı jáne áleýmettik baǵdarlamalardy júzege asyrady. Osyndaı baǵdarlamalardyń biri – STEAM JasSpace. Joba Atyraý qalasynyń jastary men balalaryna paıdaly bolyp, tehnıkalyq daǵdylarǵa úıretetinine jáne zamanaýı eńbek naryǵynda jumysqa ornalasý múmkindikterin arttyratynyna senimdimin», – dep atap ótti «Shevron» Eýrazıalyq bólimshesi basqarýshy dırektorynyń mindetin atqarýshysy Mark Peın.
Baǵdarlama «Shevron» kompanıasymen seriktestikte iske asyrylady jáne STEAM baǵdarlamasy boıynsha mektep oqýshylaryn oqytýdy, sondaı-aq STEAM baǵyttary boıynsha biliktilikti arttyrý kýrstary arqyly Atyraý oblysy pedagogteriniń áleýetin keńeıtýdi qamtıdy.
Baǵdarlamany Ortalyq Azıanyń Eýrazıa Qory Abaı atyndaǵy ortalyǵymen, Atyraý oblysynyń ákimdigimen jáne jergilikti uıymdarmen birlesip júzege asyrady.
«Bizdiń Qordyń mindetteriniń biri – STEAM baǵyttary boıynsha Abaı atyndaǵy ortalyqtyń oqytýshylarynyń biliktiligin, Atyraý oblysynyń jalpy bilim beretin mektepterdiń muǵalimderiniń áleýetin arttyrý jáne Atyraý oblysynyń oqýshylary men jastaryna STEAM baǵyty boıynsha qosymsha bilim berýdi uıymdastyrýǵa kómek kórsetý bolyp tabylady», – dep atap ótti Ortalyq Azıanyń Eýrazıa Qorynyń dırektory Rınad Temirbekov.
