Kúnine maılylyǵy 4 paıyzben 2600 lıtr sút óndiriledi. Ónim alý kezinde ferma 40 orynǵa arnalǵan nemistiń «Karýsel» saýý qurylǵylaryn qoldanady. Yńǵaıly ári jumysshy kúshin qajet etpeıtin jańa qondyrǵy tolyqtaı avtomattandyrylǵan. Tıisinshe, jumystyń barlyǵy da kompútermen baqylanady.
Ár saýylatyn zeńgibaba tóline elektrondy chıp ornatylǵan. Nómirlenip belgilengen ár sıyrdyń kúndelikti salmaǵy, rasıony, qansha lıtr sút bergeni jóninde aqparat bilip otyrady. Sondaı-aq, olardyń túrli aýrýlardan amandyǵyn da tekserýge múmkindik bar.
Sút ónimder Taldyqorǵan qalasyndaǵy «JLC sút» seriktestigine ótkiziledi. Jumysyn jańa bastaǵan óndiris ornynda 31adam eńbekpen qamtyǵan. Seriktestik basshysynyń aıtýynsha, óndiris orny jyl sońyna deıin taǵy asyl tuqymdy 180 baspen tolyqpaqshy.
– Bizdiń jobanyń iske asyrý mejesi 2021 jylǵa deıin. Búgingi kúni buzaýymen qosqanda 600 bas sıyr baǵýdamyz. Keler jyly tolyǵymen jobany júzege asyrsaq 1150 bas bolady. Oǵan qosa keshende 240 sıyr ustaıtyn oryn ázirlenýde. Olardyń azyǵy, jem-shóp barlyǵy ózimizden. Bolashaqta elimizdegi mal sharýashylyǵy kókjıeginiń keńeıe túserin kórsetkimiz keledi, – dedi josparymen bóliskende Jánibek Ohanov.
Kóktal aýylynda iske asyrylyp otyrǵan joba quny 2,5 mlrd teńgeni quraıdy. Jalpy, «Kóktal Agro» jaýapkershiligi shekteýli seriktestigi 2004 jyly jumysyn bastaǵan bolatyn. Búginge deıin aýdanda alǵashqy bolyp egistikte tamshylatyp sýarý ádisin paıdalanýda.
Qazirgi tańda kásiporynnyń ıeliginde 1000 gektardan astam jeri bar. Ujymnyń aldaǵy ýaqytta sútten kilegeı, sarymaı, qatyq, qurt, syqpa ónimderin shyǵarýdy kózdep otyr. Oǵan daıyndyq jumystaryn bastap ta ketken.
