كۇنىنە مايلىلىعى 4 پايىزبەن 2600 ليتر ءسۇت وندىرىلەدى. ءونىم الۋ كەزىندە فەرما 40 ورىنعا ارنالعان نەمىستىڭ «كارۋسەل» ساۋۋ قۇرىلعىلارىن قولدانادى. ىڭعايلى ءارى جۇمىسشى كۇشىن قاجەت ەتپەيتىن جاڭا قوندىرعى تولىقتاي اۆتوماتتاندىرىلعان. تيىسىنشە، جۇمىستىڭ بارلىعى دا كومپيۋتەرمەن باقىلانادى.
ءار ساۋىلاتىن زەڭگىبابا تولىنە ەلەكتروندى چيپ ورناتىلعان. نومىرلەنىپ بەلگىلەنگەن ءار سيىردىڭ كۇندەلىكتى سالماعى، راسيونى، قانشا ليتر ءسۇت بەرگەنى جونىندە اقپارات ءبىلىپ وتىرادى. سونداي-اق، ولاردىڭ ءتۇرلى اۋرۋلاردان اماندىعىن دا تەكسەرۋگە مۇمكىندىك بار.
ءسۇت ونىمدەر تالدىقورعان قالاسىنداعى «JLC ءسۇت» سەرىكتەستىگىنە وتكىزىلەدى. جۇمىسىن جاڭا باستاعان ءوندىرىس ورنىندا 31ادام ەڭبەكپەن قامتىعان. سەرىكتەستىك باسشىسىنىڭ ايتۋىنشا، ءوندىرىس ورنى جىل سوڭىنا دەيىن تاعى اسىل تۇقىمدى 180 باسپەن تولىقپاقشى.
– ءبىزدىڭ جوبانىڭ ىسكە اسىرۋ مەجەسى 2021 جىلعا دەيىن. بۇگىنگى كۇنى بۇزاۋىمەن قوسقاندا 600 باس سيىر باعۋدامىز. كەلەر جىلى تولىعىمەن جوبانى جۇزەگە اسىرساق 1150 باس بولادى. وعان قوسا كەشەندە 240 سيىر ۇستايتىن ورىن ازىرلەنۋدە. ولاردىڭ ازىعى، جەم-شوپ بارلىعى وزىمىزدەن. بولاشاقتا ەلىمىزدەگى مال شارۋاشىلىعى كوكجيەگىنىڭ كەڭەيە تۇسەرىن كورسەتكىمىز كەلەدى، – دەدى جوسپارىمەن بولىسكەندە جانىبەك وحانوۆ.
كوكتال اۋىلىندا ىسكە اسىرىلىپ وتىرعان جوبا قۇنى 2،5 ملرد تەڭگەنى قۇرايدى. جالپى، «كوكتال اگرو» جاۋاپكەرشىلىگى شەكتەۋلى سەرىكتەستىگى 2004 جىلى جۇمىسىن باستاعان بولاتىن. بۇگىنگە دەيىن اۋداندا العاشقى بولىپ ەگىستىكتە تامشىلاتىپ سۋارۋ ءادىسىن پايدالانۋدا.
قازىرگى تاڭدا كاسىپورىننىڭ يەلىگىندە 1000 گەكتاردان استام جەرى بار. ۇجىمنىڭ الداعى ۋاقىتتا سۇتتەن كىلەگەي، سارىماي، قاتىق، قۇرت، سىقپا ونىمدەرىن شىعارۋدى كوزدەپ وتىر. وعان دايىندىق جۇمىستارىن باستاپ تا كەتكەن.
