Qazir qoǵamda turmystyq zorlyq-zombylyq taqyryby qyzý talqylanyp jatyr. Byltyr eks-ministr Qýandyq Bishimbaev áieli Saltanat Núkenova óltirdi degen aiyppen qamaýǵa alyndy. Osy jaǵdaidan keiin qoǵamda áielder men balalarǵa qatysty kez kelgen zorlyq-zombylyq qatań aiyptalady.
Áleýmettik jelide jýrnalist Syrym Itqulov ustaz Rizabek Bataluly zorlyq-zombylyqty paiǵambardyń hadisterimen aqtady dep aiyptady, - dep habarlaidy Dalanews.kz.
Jýrnalist videoda keltirilgen sózderden mysal keltirgen.
"Ol áielderdi urý kerek deidi. Din boiynsha áielderdi uryp-soǵýǵa bolady eken, tipti solai isteý kerek eken. Eń bastysy - oǵan aýyr zaqym keltirmeý jáne bir jerin syndyrmaý. ...Alyp-qosarym joq", - dep jazdy ol.
YouTube jelisinde bul video 8 jyl buryn jariialanǵan eken.
"Áielińiz sizge baǵynbai ketse, er adamnyń úsh joly bar", - dep jazylǵan video sipattamasynda.
"Quranda úsh shart qoiady. Tyńdamai qarsy shyqqan áielge er adamnyń úsh joly bar. Birinshisi - ýaǵyz-nasihat qylyńdar deidi, ... úshinshi uryńdar deidi", - deidi Rizabek Bataluly.
Ol videoda "áielder tyńdamai, sóz qaitaryp, aitqanyńdy istemei belgi beretinin" aitady.
"Sol kezde "qoi, qoi" deisiń. Ýaǵyz aitasyń. "Qudai bar, Qudaidan qoryq" deisiń. Joq tyńdamaidy. ... Úshinshi qaǵida bar. Uryńdar deidi. Jaraqat salyp, dene múshesin syndyryp qoimaityndai deńgeide nuqyp alý kerek, qazaqsha tilmen aitqanda", - deidi ol.
Jelide bul video úzindisi qyzý talqyǵa túsip jatyr.
"Erkekterdi nuqýǵa bola ma? Biraq kimnen surap otyrmyn? Ózinen álsizdi urýdy quptaǵan adamdy da urýǵa bolady demek", - dep jazdy áleýmettik jelidegilerdiń biri.
Aita keteiik, qazir áielin uryp óltirdi degen aiyp taǵylyp otyrǵan eks-ministr Qýandyq Bishimbaevtyń isine qatysty sot otyrysy jalǵasyp jatyr.
Búgingi sot otyrysynda sot-meditsina eksperti Tahir Halimnazarov jaýap berdi. Sarapshy protsess barysynda maneken arqyly marqum Saltanat Núkenovanyń ólimine qandai jaraqattar sebep bolǵanyn kórsetti.
Tahir Halimnazarov sot otyrysy barysynda sýdianyń suraqtaryna da jaýap berdi.
"Qarapaiym sózben aitsaq, basyna soqqy jasaǵanymen qosa, jábirlenýshini qylǵyndyrǵan ba?" - dedi sýdia.
Al sarapshy belgileri baryn aitty.
Artynsha sýdia "marqumnyń basyna kem degende 12-13 ret soqqy jasalyp, odan keiin qylǵyndyrǵan ba, durys pa?" dep naqtylady.
"Múmkin. Iá (moinynan qylǵyndyrǵan ba degen suraqqa jaýap - esk.)", - dedi ekspert.
Buǵan deiin sarapshy bul jaraqattar Núkenovanyń máiitin saraptaý nátijesinde anyqtalǵanyn aitqan edi.
Onyń sózinshe, munyń bári jalpylama bas jaraqaty bolyp sanalady. Oǵan betindegi jaraqattar da, bas súiegindegi jaraqattar da jatady.
Tahir Halimnazarov ólimniń sebebin aitqan kezde osy jaraqattardyń bárin birge qarastyrý kerek ekenin jetkizdi.
