Janseiit Túimebaev: «Túriktiń tehnologiiasy men ozyq tájiribesi biz úshin asa mańyzdy»
Sapary barysynda aimaq basshysy isker top múshelerimen birge Túrkiia eliniń Ystambul qalasynda bolyp, birqatar óndiris oryndaryn aralap, jetekshi kásiporyn basshylarymen kezdesý ótkizdi.
Sonymen qatar oblys ákimi J.Túimebaev bastaǵan top Túrkiia memleketiniń burynǵy prezidenti Abdýlla Gúlmen kezdesti. Áńgime barysynda Janseiit Qanseiituly eki el arasyndaǵy baýyrlastyq bailanystardy nyǵaitýdaǵy eńbegin joǵary baǵalaitynyn aitty.
Budan bólek, delegatsiia 750 gektar aýmaqta ornalasqan «Ikitelli» indýstrialdy aimaǵyn aralap kórip, ondaǵy shaǵyn jáne orta 30 myńnan astam kásiporynnyń sátti jumysyn kózben kórdi. Indýstrialdy aimaqta 300 myńdai jumysshy eńbek etedi eken. «Ikitelli» Túrkiiadaǵy eń úlken indýstrialdy aimaq. Investitsiialyq múmkindikteri men óndiristik, eksporttyq áleýetimen jáne jumyspen qamtýymen bul aimaq ekonomikanyń damýyna erekshe úles qosyp keledi. Bul aimaq zamanaýi keshendegi óndiris jáne saýda qalashyǵy bolyp tabylady.
Baýyrlas eki eldiń isker top ókilderi men sarapshy mamandary bas qosqan jiynda qos eldiń saýda-ekonomikalyq áleýetin arttyrý máseleleri keńinen talqylanyp, eki jaq ózara tájiribe almasyp, áriptestik bailanystaryn nyǵaitýǵa ýaǵdalasty.
Basqosýda oblystyń áleýmettik-ekonomikalyq ahýaly men investitsiialyq múmkindikterin keńinen tanystyrǵan Janseiit Túimebaev búgingi tańda Ońtústik jerinde indýstrialdy-innovatsiialyq baǵdarlama aiasynda 1 arnaiy ekonomikalyq jáne 11 indýstrialdy aimaq jumys istep jatqanyn málim etti.
– Bizde indýstrialdy aimaq óńirdegi barlyq aýdanda qurylǵan. Onda sheteldik investorlar úshin barlyq jaǵdai qarastyrylǵan. Biz úshin óndiris salasynda Túriktiń ozyq tehnologiiasy men mamandardyń biliktiligin arttyrý baǵytyndaǵy is-tájiribesi asa mańyzdy, – dedi oblys ákimi.
Óz kezeginde túrkiialyq kásipkerler Qazaqstannyń júrgizip otyrǵan investitsiialyq saiasatyn oń baǵalap, ekijaqty qarym-qatynasty arttyrý qajettigine nazar aýdardy.
– Bizdiń óndiristik aimaqta oryn tepken birqatar kásiporyn basshylarymen birigip, aldaǵy shilde aiynda Qazaqstanǵa jumys saparmen barýdy josparlap otyrmyz. Onyń aiasynda qazaqstandyq kásipkerlermen kezdesip, ózara iskerlik bailanystardy tereńdetpekpiz. Túrkiia men Qazaqstannyń saýda-ekonomikalyq áleýeti óte zor. Bul múmkindikterdi qos eldiń isker top ókilderi tiimdi paidalanýy tiis dep esepteimin, – deidi Túrkiiadaǵy «Eskop» óndiristik aimaǵynyń tóraǵasy Iýsýf Aqgiýn.
Túrkiia Qazaqstannyń saiasi jáne ekonomikalyq turǵydaǵy eń jaqyn jáne senimdi seriktesine ainalǵanyn aitqan «Bas tekstil» JShS direktory Talǵat Ysqaqov toqyma ónerkásibi jolǵa qoiylǵan Túrkiia elinen úirenerimiz kóp ekenin jáne osy sapardyń jemisti bolaryna senim bildirdi.
Jalpy Ońtúsik Qazaqstan – investorlar úshin tartymdy óńir. Máselen munda elimiz boiynsha jalǵyz «Qazaq-túrik» indýstrialdy aimaǵy jumys isteidi. Búginde atalǵan aimaqta baýyrlas elmen birlesken quny 25 mlrd. teńgeni quraityn 6 investitsiialyq joba júzege asýda. Nátijesinde 900 jańa jumys orny ashylady dep kútilýde. Atalǵan jobalar kezeń-kezeńimen 2020 jylǵa deiin iske qosylatyn bolady.
Qazaqstan men Túrkiia elderiniń arasyndaǵy taýar ainalym búginde 2 mlrd AQSh dollar shamasynda bolsa, aldaǵy ýaqytta bul kórsetkishti 5 mlrd dollarǵa jetkizý kózdelgen. Bul jóninde diplomatiialyq bailanystyń 25 jyldyǵy aiasynda qos memlekettiń kóshbasshylary ótken jyly Astana qalasynda bolǵan kezdesýde aitqan bolatyn.
Túrkiia negizinen Qazaqstanǵa tekstil, tamaq ónerkásibi men qural-saimandar importtasa, olar Qazaqstannyń munaiy men metaldaryna, himiia ónerkásibi ónimderine erekshe qyzyǵýshylyq tanytyp otyr.
https://dalanews.kz/35345
