Janseiit Túimebaev Eńbekshi aýdany ákiminiń esepti kezdesýine qatysty
Qaladaǵy №24 mektep-litseiiniń májilis zalynda ótken esepti kezdesýde aýdan ákimi 2017 atqarylǵan negizgi basymdyqtarǵa toqtalyp, aldaǵy ýaqytta júzege asyrylatyn jumystar jaiyn baian etti. Al turǵyndar oblys basshysynyń kútpegen jerden kirip kelgenine riza bolyp, ózderin tolǵandyrǵan máselelerin jetkizdi. Eńbekshi aýdany turǵyndarynyń basym bóligi kópqabatty úilerdiń aýlasyn jaryqtandyrý men oiyn alańshalaryn salý jáne káriz júiesi men jol, jer telimi máselesin kóterdi.
Halyqtyń saýaldary men usynystaryn muqiiat tyńdaǵan oblys ákimi kóterilip jatqan máseler kezeń-kezeńimen sheshimin tabatynyn aityp, qaladaǵy kommýnaldyq máselelerdi retke keltirý úshin oblystyq biýdjetten bólinetin qarjy jyl saiyn artyp keletinin jetkizdi.
– Osynda kóterilgen problemanyń barlyǵy nazarǵa alynyp, tiisti jumystar atqarylatyn bolady. Ózderińizge málim, búginde qala aýmaǵyna 70 myń gektar jer qosylyp, Astana men Almaty qalalary sekildi kólemi ulǵaiyp otyr. Qala aýmaǵy ulǵaiǵan saiyn kommýnaldyq máselelerdiń artatyny da belgili. Al barlyq másele birden sheshile qoimaidy, ony bilesizder. Shahar aýmaǵyn kóriktendirip, turǵyn úi-kommýnaldy sharýashylyq salasynyń jumystary jospar boiynsha istelinip jatyr. Aldaǵy ýaqytta qala aýmaǵynda 64 kóshe ortasha jóndeýden ótetin bolsa, 36 kóshe kúrdeli jóndeledi. Al onǵa jýyq kóshege jaiaý júrginshiler joly salynady, – dedi aimaq basshysy.
Budan bólek, J.Túimebaev aýdan ákimine turǵyndardan kelip túsken saýaldardyń kúrdeliligine bailanysty jiktep, 3 kúndik, 1 aptalyq, 2 aptalyq 1 ailyq merzimdermen oryndalýy týraly keste ázirleýdi tapsyrdy. Muny bir Eńbekshi aýdanyna ǵana emes qaladaǵy ózge de aýdan ákimderine júktep, onyń oryndalýyn oblys ákimi apparatynyń inspektorlary baqylaitynyn atap ótti.
Esepti kezdesý aiaqtalǵan soń oblys ákimi atalǵan mektep-litseidiń jumysymen tanysyp, bilim ordasyndaǵy Sattar Erýbaev atyndaǵy murajaidy aralap kórdi. Sonymen qatar aimaq basshysy «Jas memlekettik qyzmetker» jobasyna qatysqan oqýshylarmen tildesti.
OQO ákiminiń baspasóz qyzmeti
