Qazaqstannyń kásibi boks federatsiiasynyń prezidenti Rahymjan Erdenbekov Jánibek Álimhanulynyń jarystarǵa qatysýyna ýaqytsha shekteý qoiylǵanyn málimdedi, dep habarlaidy Dalanews.kz.
Onyń aitýynsha, sportshyǵa qatysty dopingke bailanysty is qaralyp jatqan kezeńde ol resmi jekpe-jekterge shyǵa almaidy.
Erdenbekovtiń sózinshe, qaita tekserý nátijeleri boiynsha jinalǵan barlyq qujattar tiisti halyqaralyq uiymdarǵa, sonyń ishinde WBO, IBF jáne ózge de qurylymdarǵa joldanady. Dál osy uiymdar boksshyny chempiondyq belbeýlerinen aiyrý nemese saqtap qalý jóninde túpkilikti sheshim qabyldaidy.
«Qazir tyńdaýlar júrip jatyr. Olar tolyq aiaqtalǵanǵa deiin Jánibekke jekpe-jek ótkizýge ruqsat berilmeidi», – dedi federatsiia basshysy.
Eske salaiyq, 6 jeltoqsanda Jánibek Álimhanuly Kýba boksshysy Erislandi Laramen jekpe-jekke shyǵýy tiis edi. Alaida kezdesýdiń bolmaityny resmi túrde habarlandy. Buǵan qazaqstandyq boksshynyń analizinen meldonii atty tyiym salynǵan preparat tabylǵany sebep boldy.
