"Adam óltirý" baby boiynsha kúdikke ilingen Ómirjan Rahmettiń advokaty Jandos Tuiaqovtyń sózine qaraǵanda, qazirgi kezde kúdiktiniń anasy ulymen kezdese almai otyr.
- Olar (politsiia - red.) Ómirjannyń anasymen kezdesemin degen haty bolýy tiis degen. Biz ony túsirdik. Biraq áli kezdestirtpei otyr, - deidi Jandos Tuiaqov 26 qarashada Azattyq tilshisine.
Osyǵan deiin "Janbolat Aǵadildi pyshaqtaǵanyn moiyndaǵan" kúdikti Ómirjan Rahmet politsiianyń "ózin aldap, moiyndatý videosyn túsirip alǵanyn" málimdegen edi. Advokaty birneshe kún buryn bul videoǵa bailanysty prokýratýraǵa shaǵym túsirgen.
- Qazirgi kezde Ómirjan Rahmettiń kinásin tikelei dáleldeitin naqty aiǵaqtar joq. Keibir máselelerge kelsek, tek aiyptalýshylar sózine ǵana negizdelgen. "Mine, pyshaq salǵanyn men kórdim, osylai saldy dep aitqan birde-bir adam joq" - dedi Jandos Tuiaqov.
Ol aldaǵy ýaqytta "tergeýdegi zańsyzdyqtarǵa" bailanysty aryz túsiretinin aitty.
Kóktaldaǵy tóbeleske bailanysty "Buzaqylyq" baby boiynsha kúdikke ilingen Madiiar Sydyqtyń advokaty Nurjan Qangeldiev 25 qarashada keshke qarai Nur-Sultannyń mamandandyrylǵan aýdanaralyq tergeý sotyna "tergeý kezindegi zańsyzdyqtar" jaily shaǵym túsirgen. Sot úsh kún ishinde shaǵymdy qarap, jaýabyn berýi tiis.
- Ol jerde zańsyz áreketterdi: politsiia mekemesine kirgizip, advokatsyz jaýap alǵany, 24 saǵat tamaq bermei ustap, psihologiialyq qysym kórsetkendigi jaily jazylǵan. Oǵan "moiyndamasań, túrmege qamalýyń múmkin, oilan" dep aitqan. Biraq endi bul dáleldengen joq. Endi qaralady. Shaǵymda Madiiardyń ózi jazdy, men advokaty retinde jiberdim. Ol shaǵymda "basynda eki ret jaýap aldy, úshinshisinde jaýabymdy ózgertýge májbúr boldym" dep kórsetken, - deidi Nurjan Qangeldiev Azattyq tilshisine.
Onyń sózine qaraǵanda Madiiar Sydyqqa bastapqyda qorǵanýǵa quqyǵy bar kýáger statýsy berilgen, 24-inde kúdikti statýsyna aýystyrylǵan.
Madiiardyń Sydyqtyń anasy Shynar Dúrlibaeva "tergeýdegi zańsyzdyqtarǵa qarsylyq retinde" 25 qarashada ashtyq jariialap, keiinnen densaýlyǵyna bailanysty ashtyǵyn toqtatýǵa májbúr bolǵan. Ómirjan Rahmettiń anasy politsiianyń ulyn kórsetpei otyrǵanyna shaǵymdanady.
Azattyq tilshisi 26 qarashada Nur-Sultan qalalyq politsiia departamentiniń baspasóz qyzmetine birneshe ret habarlasyp kórdi, biraq jaýap ala almady. Ishki ister ministrliginiń resmi ókili Nurdildá Oraz "barlyq suraqty baspasóz qyzmetine qoiyńyz" dedi. Al ministrliktiń baspasóz qyzmeti jaýap bermedi.
11 qarashaǵa qaraǵan túni Nur-Sultan mańyndaǵy yqsham aýdanda azamattyq belsendi, marqum Dýlat Aǵadildiń uly Janbolat Aǵadil tóbeles kezinde pyshaq jaraqatyn alyp, mert bolǵan. Politsiia oqiǵaǵa bailanysty "Adam óltirý" jáne "Buzaqylyq" baby boiynsha qylmystyq is qozǵaǵan.
12 qarashada IIM "tóbeleske qatysqandardyń barlyǵy, negizgi úsh kúdikti de" ustaldy dep málimdedi. Sol kúni ishki ister ministrliginiń tergeý departamentiniń bastyǵy Sanjar Ádilov "is boiynsha jinalǵan dálelderdiń kómegimen kúdiktilerdiń kinási dáleldendi"dep aitqan.
IIM ókili "tóbeleske qatysqan úsh adam, arasynda adam óltirdi dep kúdikke ilingeni de bar, Nur-Sultan qalalyq politsiia departamentiniń ýaqytsha qamaý izoliatoryna qamaldy" degen edi.
Tóbelestiń naqty neden shyqqany aitylmaidy. Osyǵan deiin Almaty, Nur-Sultan, Shymkent, Aqtóbe jáne ózge qalalarda belsendiler Janbolat Aǵadil men ákesi azamattyq belsendi Dýlat Aǵadildiń ólimin ashyq tergeýdi talap etken.
