Energetika ministrligi jańartylatyn energiia kózderi (JEK) salasy qalai belsendi damytyp jatqanyn aitty. Máselen, quzyrly vedomstvo málimetinshe, búginde elimizde jalpy qýaty 3122 MVt bolatyn 156 JEK nysany jumys istep tur, dep habarlaidy Dalanews.kz.
2024 jyly JEK arqyly óndirilgen elektr energiiasynyń kólemi 7,58 mlrd kVt·saǵatty qurap, jalpy óndiristiń 6,43%-yn qamtydy.
"2025 jyly jalpy qýaty 455 MVt bolatyn 9 jańa nysandy iske qosý josparlanǵan. Onyń úsheýi (90 MVt) qazirdiń ózinde paidalanýǵa berildi. Qazaqstan sheteldik investorlarmen tyǵyz jumys isteýde. Qazirgi tańda olardyń investitsiialyq jobalar portfeli shamamen 4,8 GVt-ty quraidy. Jospar boiynsha 2035 jylǵa deiin elimizde keminde 8,4 GVt JEK qýaty iske qosylady", dep naqtylaidy salalyq ministrlik.
Sonymen qatar shaǵyn kólemdegi elektr óndirý salasy da damyp keledi. Netto-tutynýshylar mehanizmi azamattar men biznes ókilderine ózderiniń kún nemese jel elektr stantsiialaryn qoldanyp, artyq energiiany elektr jelisine satyp, tabys tabýǵa múmkindik beredi.
"2024 jyly mundai kelisimsharttardyń sany 47-den 103-ke jetti. Al shaǵyn nysandardyń jalpy qýaty 6,2 MVt-qa deiin artty", - deidi ministrlikten.
Qazaqstan turaqty damý maqsattaryna josparly túrde ilgerilep, energetikalyq qaýipsizdigin nyǵaityp keledi. JEK jobalaryn júzege asyrý — energetikalyq qaýipsizdikti nyǵaitýǵa, jańa jumys oryndaryn ashýǵa, investitsiia tartýǵa jáne zamanaýi "jasyl" ekonomikany qalyptastyrýǵa yqpal etedi.
Buǵan deiin Energetika vitse-ministri Suńǵat Esimhanov jeke úilerdiń ieleri kún batareialarynan aqsha tabýyna bolatynyn aitqan. Alaida olar bul týraly áli kóp bile bermeidi nemese oǵan degen qatty qyzyǵýshylyǵy joq. Óitkeni mundai tásildi qoldanýshylar elimizde áli az eken.
