Oblys ákimi Nurlybek Nálibaevtyń qatysýymen Jańaqorǵan aýdanynda temirjol arqyly ótetin aspaly kópir ashyldy. Oǵan Parlament Májilisiniń depýtattary Murat Ergeshbaev, Murat Ábenov, ziialy qaýym ókilderi men aýdan turǵyndary qatysty,- dep habarlaidy Dalanews.kz
Aimaq basshysy jańaqorǵandyqtardy jańa kópirdiń ashylýymen quttyqtap, óńirdegi jol infraqurylymyn damytý jumystaryna toqtaldy.
“Memleket basshysy Qasym-Jomart Kemeluly: «Jer kólemi jóninen álemde toǵyzynshy oryn alatyn elimizdiń kólik-tranzit salasynda zor múmkindikteri bar. Bul – airyqsha nazar aýdarýdy talap etetin strategiialyq baǵyt», - degen bolatyn. 2023-2025 jyldary aimaǵymyzdyń 1 232 shaqyrym avtomobil joldary men kóshelerin, 18 kópir ótkelin salýǵa, kúrdeli jóndeýge 121 mlrd. 500 mln. teńge bólindi. Nátijesinde jaqsy jaǵdaidaǵy joldardyń úlesi 92 paiyzǵa jetti. Biyl 329 shaqyrym jol jóndelip, jaqsy jaǵdaidaǵy joldardyń úlesi 95 paiyz bolmaq.
Respýblikalyq mańyzy bar «Qyzylorda-Jezqazǵan» avtomobil jolyn qaita jańǵyrtý jumystary biyl aiaqtalady. Qyzylorda qalasyndaǵy temirjol asty avtojolynyń qurylysy qarqyndy júrýde. Bul qaladaǵy kólik qatynasynyń júktemesin birshama tómendetedi. Mamyr aiynda Aral qalasynda 940 metrlik aspaly kópir el igiligine tabystaldy. Jaqyn kúnderi Qarmaqshy aýdanynyń Josaly kentinde dál osyndai aspaly kópir qurylysyn bastaimyz.
Jańa kópir Jańaqorǵannyń bolashaǵyna jol ashatyn, el igiligine qyzmet etetin altyn kópirge ainalsyn! Barshańyzǵa amandyq, jasampaz isterimizge tolaǵai tabys tileimin!”, - dedi Nurlybek Mashbekuly.
Rásimde Májilis depýtaty Murat Ábenov, el aǵasy Nájmádin Musabaev quttyqtaý sóz sóiledi.
Jańaqorǵan aýdanynyń qurmetti azamaty Serhoja Ydyrysov batasyn berdi.
Sondai-aq, aspaly kópirdi salǵan merdiger mekeme qyzmetkerleri men aýdannyń damýyna úles qosqan birqatar azamattar oblys ákiminiń Alǵys hatymen marapattaldy.
Aita keteiik, Jańaqorǵan aýdanynyń biýdjeti sonǵy 2 jylda 12,7 mlrd teńgeden 22 mlrd teńgege artty.
Úsh jylda 200 mlrd teńgege jýyq investitsiia tartyldy. Aýyz sý máselesi tolyq sheshildi, 4 eldi mekenniń sý jelileri jańartylyp, aýdan halqy 100% taza aýyz sýmen qamtyldy.
Búginde turǵyndardyń 52%-y "kógildir otyn" tutynýda. Taǵy 8 eldi mekendi gazdandyrýǵa 7,3 mlrd teńge bólinip, jumys biyl aiaqtalady.
«Jaily mektep» ulttyq jobasy aiasyndaǵy 10 mekteptiń ekeýi Jańaqorǵanda salyndy. Sonymen birge 3 jańa ambýlatoriia jáne Tómenaryqta 15 oryndyq aýrýhana paidalanýǵa berildi. Jaqynda 972 mln teńgege aýdandyq aýrýhanaǵa qosymsha ǵimarat salynyp, qazan aiynda qoldanysqa beriledi.
