وبلىس اكىمى نۇرلىبەك نالىبايەۆتىڭ قاتىسۋىمەن جاڭاقورعان اۋدانىندا تەمىرجول ارقىلى وتەتىن اسپالى كوپىر اشىلدى. وعان پارلامەنت ءماجىلىسىنىڭ دەپۋتاتتارى مۇرات ەرگەشبايەۆ، مۇرات ابەنوۆ، زيالى قاۋىم وكىلدەرى مەن اۋدان تۇرعىندارى قاتىستى،- دەپ حابارلايدى Dalanews.kz
ايماق باسشىسى جاڭاقورعاندىقتاردى جاڭا كوپىردىڭ اشىلۋىمەن قۇتتىقتاپ، وڭىردەگى جول ينفراقۇرىلىمىن دامىتۋ جۇمىستارىنا توقتالدى.
“مەملەكەت باسشىسى قاسىم-جومارت كەمەل ۇلى: «جەر كولەمى جونىنەن الەمدە توعىزىنشى ورىن الاتىن ەلىمىزدىڭ كولىك-ترانزيت سالاسىندا زور مۇمكىندىكتەرى بار. بۇل – ايرىقشا نازار اۋدارۋدى تالاپ ەتەتىن ستراتەگيالىق باعىت»، - دەگەن بولاتىن. 2023-2025 جىلدارى ايماعىمىزدىڭ 1 232 شاقىرىم اۆتوموبيل جولدارى مەن كوشەلەرىن، 18 كوپىر وتكەلىن سالۋعا، كۇردەلى جوندەۋگە 121 ملرد. 500 ملن. تەڭگە ءبولىندى. ناتيجەسىندە جاقسى جاعدايداعى جولداردىڭ ۇلەسى 92 پايىزعا جەتتى. بيىل 329 شاقىرىم جول جوندەلىپ، جاقسى جاعدايداعى جولداردىڭ ۇلەسى 95 پايىز بولماق.
رەسپۋبليكالىق ماڭىزى بار «قىزىلوردا-جەزقازعان» اۆتوموبيل جولىن قايتا جاڭعىرتۋ جۇمىستارى بيىل اياقتالادى. قىزىلوردا قالاسىنداعى تەمىرجول استى اۆتوجولىنىڭ قۇرىلىسى قارقىندى جۇرۋدە. بۇل قالاداعى كولىك قاتىناسىنىڭ جۇكتەمەسىن ءبىرشاما تومەندەتەدى. مامىر ايىندا ارال قالاسىندا 940 مەترلىك اسپالى كوپىر ەل يگىلىگىنە تابىستالدى. جاقىن كۇندەرى قارماقشى اۋدانىنىڭ جوسالى كەنتىندە ءدال وسىنداي اسپالى كوپىر قۇرىلىسىن باستايمىز.
جاڭا كوپىر جاڭاقورعاننىڭ بولاشاعىنا جول اشاتىن، ەل يگىلىگىنە قىزمەت ەتەتىن التىن كوپىرگە اينالسىن! بارشاڭىزعا اماندىق، جاسامپاز ىستەرىمىزگە تولاعاي تابىس تىلەيمىن!”، - دەدى نۇرلىبەك ماشبەك ۇلى.
راسىمدە ءماجىلىس دەپۋتاتى مۇرات ابەنوۆ، ەل اعاسى ءناجمادين مۇسابايەۆ قۇتتىقتاۋ ءسوز سويلەدى.
جاڭاقورعان اۋدانىنىڭ قۇرمەتتى ازاماتى سەرحوجا ىدىرىسوۆ باتاسىن بەردى.
سونداي-اق، اسپالى كوپىردى سالعان مەردىگەر مەكەمە قىزمەتكەرلەرى مەن اۋداننىڭ دامۋىنا ۇلەس قوسقان ءبىرقاتار ازاماتتار وبلىس اكىمىنىڭ العىس حاتىمەن ماراپاتتالدى.
ايتا كەتەيىك، جاڭاقورعان اۋدانىنىڭ بيۋدجەتى سونعى 2 جىلدا 12،7 ملرد تەڭگەدەن 22 ملرد تەڭگەگە ارتتى.
ءۇش جىلدا 200 ملرد تەڭگەگە جۋىق ينۆەستيسيا تارتىلدى. اۋىز سۋ ماسەلەسى تولىق شەشىلدى، 4 ەلدى مەكەننىڭ سۋ جەلىلەرى جاڭارتىلىپ، اۋدان حالقى 100% تازا اۋىز سۋمەن قامتىلدى.
بۇگىندە تۇرعىنداردىڭ 52%-ى "كوگىلدىر وتىن" تۇتىنۋدا. تاعى 8 ەلدى مەكەندى گازداندىرۋعا 7،3 ملرد تەڭگە ءبولىنىپ، جۇمىس بيىل اياقتالادى.
«جايلى مەكتەپ» ۇلتتىق جوباسى اياسىنداعى 10 مەكتەپتىڭ ەكەۋى جاڭاقورعاندا سالىندى. سونىمەن بىرگە 3 جاڭا امبۋلاتوريا جانە تومەنارىقتا 15 ورىندىق اۋرۋحانا پايدالانۋعا بەرىلدى. جاقىندا 972 ملن تەڭگەگە اۋداندىق اۋرۋحاناعا قوسىمشا عيمارات سالىنىپ، قازان ايىندا قولدانىسقا بەرىلەدى.
