14 jeltoqsanda Jańaózen qalasynda «Ózen» munai kásipshiligi basqarmasynyń birinshi direktory, Jańaózen qalasynyń negizin qalaýshy, KSRO-nyń qurmetti munaishysy, Qazaq KSR-niń eńbek sińirgen munaishysy Rahmet Ótesinovti eske alýǵa arnalǵan merekelik is-shara ótti.
Saltanatty is-sharaǵa Mańǵystaý oblysy ákiminiń orynbasary Qanat Quljanov, Rahmet Ótesinovtiń jaqyndary men urpaqtary, ardager munaishylar, «QazMunaiGaz» UK AQ Basqarma tóraǵasynyń orynbasary Dáýletjan Hasanov, munai-gaz salasynyń ardageri Uzaqbai Qarabalin, munaishynyń zamandastary men shákirtteri jáne ózge de qonaqtar qatysty.
Jańaózen qalasynyń negizin qalaýshy tulǵa retinde qala ortalyǵynda Rahmet Ótesinovke arnap eskertkish ornatyldy. Sonymen qatar, júzýden jasóspirim uldar men qyzdar arasynda oblystyq týrnirdiń ashylýy, tarihi tulǵanyń ómir derekterine arnalǵan shaǵyn kitap, foto kórmesi ótti.
Atalǵan is-sharalar Jańaózen qalasynyń 55 jyldyq mereitoiynyń aiasynda uiymdastyryldy.
«Ózen ken ornyn igerý bastalǵan jyldary onyń kásibi biliktiligi men sheberligi, óndiristi uiymdastyrý qabileti jan-jaqty ashyldy. El joq, jurt joq japan túzde onyń tikelei basshylyǵymen Qazaqstan munaishylarynyń dańqty mekeni – Jańaózen qalasy quryldy. Onyń kásibi sheberligi, tereń bilimi, ómirlik tájiribesi munai-gaz salasyn damytýǵa septigin tigizdi», – dep atap ótti Dáýletjan Hasanov.
Saltanatta sóz alǵan ardager munaishylar, R.Ótesinovtyń jubaiy Saqysh Qarabalina, atqarýshy bilik ókilderi estelikterin bólisip, dańqty munaishynyń esimin ulyqtap, murasyn jas urpaqqa úlgi etti.
Jańaózen qalasynyń irgetasyn qalap, 1964-1970 jyldary «Ózen» munai kásipshiligi basqarmasynyń tuńǵysh basshysy bolǵan Rahmet Ótesinov munai salasynyń damýyna ólsheýsiz úles qosty.
