14 جەلتوقساندا جاڭاوزەن قالاسىندا «وزەن» مۇناي كاسىپشىلىگى باسقارماسىنىڭ ءبىرىنشى ديرەكتورى، جاڭاوزەن قالاسىنىڭ نەگىزىن قالاۋشى، كسرو-نىڭ قۇرمەتتى مۇنايشىسى، قازاق كسر-نىڭ ەڭبەك سىڭىرگەن مۇنايشىسى راحمەت وتەسىنوۆتى ەسكە الۋعا ارنالعان مەرەكەلىك ءىس-شارا ءوتتى.
سالتاناتتى ءىس-شاراعا ماڭعىستاۋ وبلىسى اكىمىنىڭ ورىنباسارى قانات قۇلجانوۆ، راحمەت وتەسىنوۆتىڭ جاقىندارى مەن ۇرپاقتارى، ارداگەر مۇنايشىلار، «قازمۇنايگاز» ۇك اق باسقارما ءتوراعاسىنىڭ ورىنباسارى داۋلەتجان حاسانوۆ، مۇناي-گاز سالاسىنىڭ ارداگەرى ۇزاقباي قارابالين، مۇنايشىنىڭ زامانداستارى مەن شاكىرتتەرى جانە وزگە دە قوناقتار قاتىستى.
جاڭاوزەن قالاسىنىڭ نەگىزىن قالاۋشى تۇلعا رەتىندە قالا ورتالىعىندا راحمەت وتەسىنوۆكە ارناپ ەسكەرتكىش ورناتىلدى. سونىمەن قاتار، جۇزۋدەن ءجاسوسپىرىم ۇلدار مەن قىزدار اراسىندا وبلىستىق ءتۋرنيردىڭ اشىلۋى، تاريحي تۇلعانىڭ ءومىر دەرەكتەرىنە ارنالعان شاعىن كىتاپ، فوتو كورمەسى ءوتتى.
اتالعان ءىس-شارالار جاڭاوزەن قالاسىنىڭ 55 جىلدىق مەرەيتويىنىڭ اياسىندا ۇيىمداستىرىلدى.
«وزەن كەن ورنىن يگەرۋ باستالعان جىلدارى ونىڭ كاسىبي بىلىكتىلىگى مەن شەبەرلىگى، ءوندىرىستى ۇيىمداستىرۋ قابىلەتى جان-جاقتى اشىلدى. ەل جوق، جۇرت جوق جاپان تۇزدە ونىڭ تىكەلەي باسشىلىعىمەن قازاقستان مۇنايشىلارىنىڭ داڭقتى مەكەنى – جاڭاوزەن قالاسى قۇرىلدى. ونىڭ كاسىبي شەبەرلىگى، تەرەڭ ءبىلىمى، ومىرلىك تاجىريبەسى مۇناي-گاز سالاسىن دامىتۋعا سەپتىگىن تيگىزدى»، – دەپ اتاپ ءوتتى داۋلەتجان حاسانوۆ.
سالتاناتتا ءسوز العان ارداگەر مۇنايشىلار، ر.وتەسىنوۆتىڭ جۇبايى ساقىش قارابالينا، اتقارۋشى بيلىك وكىلدەرى ەستەلىكتەرىن ءبولىسىپ، داڭقتى مۇنايشىنىڭ ەسىمىن ۇلىقتاپ، مۇراسىن جاس ۇرپاققا ۇلگى ەتتى.
جاڭاوزەن قالاسىنىڭ ىرگەتاسىن قالاپ، 1964-1970 جىلدارى «وزەن» مۇناي كاسىپشىلىگى باسقارماسىنىڭ تۇڭعىش باسشىسى بولعان راحمەت وتەسىنوۆ مۇناي سالاسىنىڭ دامۋىنا ولشەۋسىز ۇلەس قوستى.
