Jańa ulttyq kompaniia qurylmaqshy
– Bizdiń elde investitsiia tartýmen birneshe uiym ainalysady. Soǵan bailanysty, Prezident naqty tapsyrmalar júktedi – investorlarǵa memlekettik qyzmettiń tolyq spektrin usynatyn, bir tereze qaǵidatymen jumys isteitin arnaiy ulttyq kompaniia qurý. Bul kompaniia qurylady. Búgin Úkimet otyrysynda QR Premer-Ministri osy baǵytta qashan jáne qandai sharalar atqarý kerektigin aitty. Sondyqtan osy turǵyda bizde tolyq túsinik bar, – dep atap ótti Timýr Súleimenov Úkimet otyrysynan keiin ótkizilgen baspasóz máslihatynda.
Aita keteiik, Prezident Nursultan Nazarbaev óziniń el halqyna arnaǵan «Qazaqstannyń úshinshi jańǵyrýy: jahandyq básekege qabilettilik» taqyrybyndaǵy joldaýynda Qazaqstan shetel investitsiialaryn tartý isindegi kóshbasshylyǵyn saqtap qalýy qajettigin atap ótken bolatyn. «Astana» halyqaralyq qarjy ortalyǵy el ekonomikasyna qarjy resýrstaryn tartýda mańyzdy ról atqarýǵa tiis. Biz taýar óndirý men ótkizý, qyzmet kórsetý isin jahandyq jelige beiimdeýimiz kerek. Muny, eń aldymen, transulttyq kompaniialardy tartý arqyly jasaǵan jón. Qazaqstanda óndirister ashý jónindegi Qytaimen birlesken investitsiialyq baǵdarlamany tiimdi júzege asyrý kerek. Qytai tarapymen ýaǵdalastyqqa qol jetkizildi. Nysandar belgilendi. Naqty jumys isteý qajet», – delingen Joldaýda.
