Birjadan tabys taýyp júrgenderdi birqatar zańnamalyq ózgerister kútip tur. Óitkeni Májilis dividendterge qatysty qarastyrylatyn salyqtyq jeńildikterdi joiyp, kerisinshe ondai tabystarǵa 5-15% kóleminde jeke tabys salyǵyn engizýge nietti, dep habarlaidy Dalanews.kz.
Májilis depýtaty Berik Beisenǵaliev basqaratyn jumys toby jańa Salyq kodeksiniń jobasyna birqatar ózgerister engizýdi usynyp otyr. Sonyń ishinde:
- jeke tulǵalardyń (Qazaqstan azamattarynyń) alatyn 1 mlrd teńgege deiingi dividendterine 5%, al 1 mlrd jáne odan joǵary somadaǵylarǵa 15% jeke tabys salyǵyn salýdy;
- KASE-de belsendi satylatyn aktsiialar boiynsha 30 000 AEK-ke deiingi dividendterge salyqtyq jeńildik berý shegin yryqtandyrý, sondai-aq saýda belsendiligin baǵalaýshy qazirgi kriteriilerdi de ózgertý.
Aita ketsek, qazirgi qoldanystaǵy salyq zańnamasyna sáikes, KASE-de belsendi satylatyn aktsiialardan túsken 30 000 AEK-ke deiingi kólemdegi dividendter salyqtan bosatylady, eger:
- Aktsiialar KASE-de saýdalansa;
- Bul aktsiialar úkimet bekitken saýda belsendiligi kriterilerine sai kelse. Osyndai jeńildik AHQO aiasynda jumys isteitin AIX birjasynda da qarastyrylǵan.
Depýtattar usynǵan osy jańa ózgerister qabyldansa ne bolady? QAMS (Qazaqstan minoritarlyq aktsionerleri qaýymdastyǵy) bul birjalar arasynda salyqtyq arbitrajdyń týyndaýyna ákelip soǵýy múmkin ekenin aitady.
"Sebebi, AIX birjasynda mundai ózgerister engizý úshin AHQO týraly konstitýtsiialyq zańǵa túzetýler engizý qajet bolady. Al bul AHQO-daǵy salyqtyq rejimniń 2066 jylǵa deiin ózgermeitini jónindegi kepildikke selkeý túsiredi. Sonymen qatar zań shyǵarýshylar Ulttyq ekonomika jáne Qarjy ministrlikteriniń bastamasymen aktsiialary birjalarda saýdalanatyn jáne saýdalanbaityn kompaniialardyń dividendterine salyq salýdy teńestirýdi kózdep otyr. Osy jaǵynan alǵanda, memleket bul áreketi arqyly investorlarǵa mynandai belgi berip otyr: naryqtaǵy ashyqtyq pen aqparattyń jariialylyǵyn talap etýshi birjalyq saýdany damytý basty basymdyq bolyp tabylmaidy", - deidi qaýymdastyqtaǵylar.
QAMS qaýymdastyǵy jumysshy topqa Qazaqstan azamattarynyń dividentteri boiynsha salyq salymynan bosatý shegin 10 000 AEK shamasynda belgileýdi usynady. Sondai-aq sheteldik birjalarda jeke investorlardyń shyǵyndaryn esepke alýǵa múmkindik beretin ádiletti salyq salymy tásiliniń qoldanylýyn suraidy.
QAMS qaýymdastyǵynyń ókilderi parlament qabyrǵasynda minoritarlyq investorlardyń pikiri eskeriledi dep úmittenedi.
Qarjy naryǵyn retteý jáne damytý agenttigi, "Atameken" ulttyq kásipkerler palatasy jáne Qazaqstan qarjygerleri qaýymdastyǵy da jumys tobynyń usynystaryn qoldamaitynyn jetkizdi.
Jańa Salyq kodeksiniń jobasy Májilistiń ekinshi oqylymyna sársenbi kúni usynylyp qalady dep kútilip otyr.
Buǵan deiin saitymyzda "Depýtat milliardtap divident alatyn bankterdiń aktsionerlerine de salyq salýdy usyndy" degen maqala jariialanǵan bolatyn. Májilis depýtat Ermurat Bápi jyl sońynda milliardtap divident alatyn otandyq bankterdiń aktsionerleri salyqtan bosatylatyndyǵyna óz narazylyǵyn bildirgen. Sóitip ol 100 mln teńgege deiin divident alatyn aktsionerlerge 10%, al milliardtap alatyndarǵa 15%-ǵa deiin salyq salýdy usynǵan edi. "Eger mundai usynys bolyp jatsa, onda biz óz tarapymyzdan ony qoldar edik", degen edi sol kezde QR Premer-ministriniń orynbasary – QR Ulttyq ekonomika ministri Serik Jumanǵarin.
