Jetisý oblysynda Naýryz meiramynyń onkúndigi aiasyndaǵy Mádeniet jáne ulttyq salt-dástúrler kúnine orai «Ómirge alǵashqy qadam» atty tusaýkeser rásimi ótkizilip, bir mezgilde 336 balanyń tusaýy kesildi. Bul rásim Qazaqstannyń Rekordtar kitabyna engizildi, dep habarlaidy Dalanews.kz
Taldyqorǵan qalasyndaǵy shara «Jastar» Sport saraiynda oblys ákimi Beibit Isabaevtyń qatysýymen ótti. Merekelik rásim Qydyr ata keipindegi qariianyń kópke bata berýimen bastaldy.
Oblystyń aýdan-qalalary Sport saraiyndaǵy sharaǵa beinebailanys arqyly qosyldy. Osy kúni Kerbulaq, Kóksý, Eskeldi, Alakól, Sarqan aýdandarynda 30 baladan, Aqsý aýdany men Tekeli qalasynda 20 baladan, Qaratal aýdanynda 50 bala, sondai–aq Taldyqorǵan qalasynda, jalpy sany 336 balanyń bir mezgilde tusaýy kesildi. Tusaýkeser rásimin balalardyń joly ashyq, qadamy nyq, ómiri uzaq bolsyn degen nietpen kópke syily ardagerler, óner qairatkerleri, qalamgerler, jýrnalister, dárigerler, memlekettik qyzmetshiler, kásipkerler, qoǵamdyq birlestik ókilderi t.b. atqardy.
Sharada Rekordtardy tirkeý komissiiasynyń múshesi Baqytjan Tastúlekov sóz sóiledi.
"Elimizde úsh júzden astam balanyń tusaýyn bir mezgilde kesý alǵash ret Jetisý oblysynda ótkizilip otyr. Sondyqtan bul fakt Qazaqstannyń rekordtar kitabyna engizildi", - dedi ol jáne ony rastaityn sertifikat usyndy.
Kóp balaly ana, úshemderdi ómirge ákelgen Senbai Tursynbek te osy merekede sábileriniń tusaýyn keskizýge arnaiy alyp keldi. Alǵashqy qadamyn jasaǵan búldirshinderdiń tusaýyn bilim berý salasynyń úzdigi, 40 jylǵa jýyq tájiribesi bar injener-pedagog Áset Jumadilov kesti.
"Otbasynda alty balamyz bar, tuńǵyshymyz Daryn 13 jasta, ol da búgin menimen birge keldi. Kúieýim aspaz bolyp jumys isteidi. Búgin osy mereke kúni úsh kishkentaiym - Darhan, Diana, Dariianyń tusaýyn keskizdim. Bul rásimniń dál Naýryz kúnderinde atqarylǵanyn jaqsyǵa balap otyrmyn. Balalarymnyń aldaǵy bolashaq joly úshin jaqsy bir belgi dep sanaimyn", - dedi ol.
Osy kúni Naýryzbaevtar otbasy da qýanyshqa kenelip, 22 naýryzda bir jasqa tolatyn kishkentai Inaiattyń tusaýy kesildi:
"Tuńǵysh balamyzdyń osyndai merekelik, saltanatty jaǵdaida alǵashqy qadamyn jasaǵanyna qatty qýanyp turmyz. Jastardyń ulttyq dástúrlerimizdi saqtap, ony ustanýǵa belsendi qatysqanyn qoshtaimyn", - deidi Inaiattyń anasy Diana Álimbek.
S. Lýganskii atyndaǵy Taldyqorǵan aviabazasynyń komandiri, 10 jyldan astam ushqysh qyzmetin atqaryp kele jatqan kapitan Aidos Dosmuhambetovtiń otbasy da quttyqtaý tilekterin jetkizdi.
"Úilengenimizge 6 jyl boldy, eki balamyz bar. Búgin 11 ailyq qyzymyz Alsafidiń tusaýyn kestik. Búgingi sharaǵa qatysqan balalardyń bárine qutty qadam tileimiz, joldary ashyq bolsyn. Naýryz merekesimen barsha halyqty quttyqtaimyz", - dedi onyń jubaiy Armangúl Tólegen.
Taǵy bir qýanysh iesi - Ásel Myrzahanqyzy óziniń jyly lebizin jetkizdi.
"Úsh balanyń anasymyn. Ulym Beibarys, qyzym Aikúnim jáne kishi ulym Qunanbai bárimiz munda birge keldik. Búgin kishi balamnyń tusaýy kesildi. Biz otbasynda dástúr-saltymyzdy qurmet tutamyz, ata-babalarymyzdyń ustanǵan tálimdi jolyn jalǵastyrýǵa, tarihty bilýge, mádeni muralarymyzdy saqtaýǵa erekshe kóńil bólemiz. Búgingi shara da - sondai qurmettiń biri", - dedi «TATEK» AQ injeneri Ásel Myrzahanqyzy.
Al bul kúni Qaratal aýdanynda tusaýy kesilgen 30 balaǵa baiǵazy retinde qozy syiǵa berildi.
"Bizdiń otbasymyz úshin búgin qýanysh, qyzymyz alǵashqy qadamyn jasady. Naýryz meiramymen, Qasietti Ramazan aiymen tuspa-tus kelgen jaqsylyqqa áýletimiz erekshe qýanyp otyr. Uiymdastyrýshylarǵa úlken rahmet. Búgin qyzyma syiǵa tartylǵan kishkentai qozysy endi ózimen birge shapqylap oinap ósetin boldy", - dedi kópbalaly ana, «Altyn alqa» iegeri Lida Janbota.
